बनवडी ग्रामपंचायतीतील पाणी योजनेतील गैरव्यवहाराचा भांडाफोड तत्कालीन सरपंच प्रदीप पाटील अपात्र; प्रशासनाची कठोर कारवाई

 

कराड विद्या मोरे.                                                         बनवडी ग्रामपंचायतीतील 24×7 पाणीपुरवठा योजनेच्या नावाखाली नागरिकांकडून वसूल करण्यात आलेल्या पाणीबिलांमध्ये मोठ्या प्रमाणात आर्थिक गैरव्यवहार झाल्याचा गंभीर प्रकार उघडकीस आला आहे. या प्रकरणात विभागीय आयुक्त, पुणे यांनी दिलेल्या आदेशामुळे ग्रामपंचायतीतील कथित भ्रष्ट कारभारावर शिक्कामोर्तब झाले आहे. 

🔹 पाणीबिलांमधून नागरिकांच्या पैशांचा गैरवापर

24×7 पाणीपुरवठा योजनेअंतर्गत ग्राहकांकडून आकारण्यात आलेल्या पाणीबिलांमध्ये नियमबाह्य वसुली व आर्थिक अपहार झाल्याचे निदर्शनास आले आहे. या योजनेतील व्यवहारांबाबत अनेक नागरिकांनी तक्रारी दाखल केल्या होत्या. मात्र या तक्रारींकडे ग्रामपंचायतीकडून दुर्लक्ष करण्यात आल्याचा आरोप आहे.

🔹  विभागीय आयुक्तांचा कडक आदेश

या प्रकरणाची दखल घेत विभागीय आयुक्त, पुणे यांनी सखोल चौकशी करून ग्रामपंचायत बनवडीचे तत्कालीन सरपंच व विद्यमान सदस्य श्री. प्रदीप मोहन पाटील यांना महाराष्ट्र ग्रामपंचायत अधिनियम 1959 च्या कलम 39(1) अंतर्गत अपात्र ठरवून पदमुक्त करण्याचा आदेश दिला आहे. हा आदेश ग्रामपंचायतीतील भ्रष्ट कारभाराविरोधात मोठी कारवाई मानली जात आहे.

🔹 गंभीर अनियमितता व अधिकारांचा दुरुपयोग सिद्ध

आयुक्तांच्या आदेशात ग्रामपंचायतीच्या कामकाजात गंभीर अनियमितता, कर्तव्यात जाणीवपूर्वक कसूर तसेच अधिकारांचा गैरवापर झाल्याचे स्पष्टपणे नमूद करण्यात आले आहे. प्रशासनाने या बाबी केवळ आरोप म्हणून नव्हे, तर उपलब्ध पुराव्यांच्या आधारे सिद्ध झाल्याचे मान्य केले आहे.

🔹 सात खोटी प्रतिज्ञापत्रे फेटाळली

तत्कालीन सरपंचांच्या समर्थनार्थ ग्रामपंचायतीतील सात सदस्यांनी प्रतिज्ञापत्रे सादर केली होती. मात्र ही प्रतिज्ञापत्रे खोटी, दिशाभूल करणारी व वस्तुस्थितीशी विसंगत असल्याचे ठरवत विभागीय आयुक्तांनी ती पूर्णतः फेटाळून लावली आहेत. यामुळे या प्रकरणात संगनमताने गैरकारभार झाल्याचा संशय अधिक बळावला आहे.

🔹 तक्रारींकडे जाणीवपूर्वक दुर्लक्ष?

बनवडी ग्रामपंचायतीत गेल्या काही वर्षांपासून भ्रष्टाचार, मनमानी कारभार आणि लोकशाही प्रक्रियेची पायमल्ली सुरू असल्याच्या तक्रारी सातत्याने होत होत्या. मात्र संबंधित यंत्रणांकडून या तक्रारींकडे जाणीवपूर्वक डोळेझाक करण्यात आल्याचा आरोप ग्रामस्थ करत आहेत. अखेर प्रशासनाच्या आदेशामुळे सत्य समोर आल्याची भावना व्यक्त होत आहे.              

🔹 फौजदारी कारवाईची जोरदार मागणी

या प्रकरणात केवळ अपात्रतेपुरते न थांबता, 24×7 पाणीपुरवठा योजनेतील सर्व आर्थिक व्यवहारांची सखोल चौकशी करून दोषींवर फौजदारी कारवाई करण्यात यावी, अशी जोरदार मागणी ग्रामस्थ व सामाजिक कार्यकर्त्यांकडून होत आहे.

🔹 खोटे प्रतिज्ञापत्र : विद्यमान सरपंचांवर गुन्हा

ज्ञानदेवतेसमोर खोटे प्रतिज्ञापत्र सादर केल्याप्रकरणी विद्यमान सरपंच अश्विनी शिवराज विभुते यांच्याविरोधात फौजदारी गुन्हा दाखल करण्यात आल्याची माहिती सूत्रांनी दिली. यामुळे ग्रामपंचायतीतील सत्ताधाऱ्यांच्या अडचणी आणखी वाढण्याची शक्यता आहे.

🔹 पुढील चौकशीचे संकेत

या आदेशामुळे बनवडी ग्रामपंचायतीतील कथित भ्रष्टाचार प्रकरणाला नवे वळण मिळाले असून, भविष्यात आणखी चौकशा व कारवाया होण्याची शक्यता व्यक्त केली जात आहे. प्रशासनाच्या या कारवाईमुळे स्थानिक स्वराज्य संस्थांतील गैरकारभाराविरोधात स्पष्ट संदेश गेला असल्याचे बोलले जात आहे.