🇮🇳 “वंदे मातरम्” गीताला १५० वर्षे पूर्ण – कराडमध्ये देशभक्तीचा उत्साह ओसंडून वाहिला! 🇮🇳

कराड, विद्या मोरे 

भारताच्या स्वातंत्र्यलढ्याचे प्रेरणास्रोत ठरलेल्या “वंदे मातरम्” या अमर देशभक्तीपर गीताला यावर्षी १५० वर्षे पूर्ण झाली असून, त्या निमित्ताने लायन्स क्लब कराड सिटी आणि शहर पोलीस स्टेशन कराड यांच्या संयुक्त विद्यमाने तसेच परिसरातील सर्व पोलिस पाटील यांच्या सहकार्याने एक विशेष मानवंदना कार्यक्रम अत्यंत उत्साहात आयोजित करण्यात आला.

कार्यक्रमाची सुरुवात “वंदे मातरम्” या गीताच्या मंगल ध्वनीने झाली. देशभक्तीच्या भावनेने भारलेले वातावरण निर्माण झाले. उपस्थितांनी गीताच्या स्वरांमध्ये हात उंचावून मातृभूमीला मानवंदना दिली. देशप्रेम, एकता आणि सामाजिक ऐक्याचा संदेश देणाऱ्या या कार्यक्रमाला नागरिकांनीही मोठ्या संख्येने प्रतिसाद दिला.

या प्रसंगी कराड शहर पोलिस ठाण्याचे वरिष्ठ निरीक्षक, तहसीलदार तसेच त्यांच्या सहकारी अधिकारी आणि कर्मचारी उपस्थित होते. लायन्स क्लब कराड सिटी तर्फे अध्यक्ष लायन शशिकांत पाटील, सचिव लायन अनिल पाटील,  कॅबिनेट युथ लायन विद्या मोरे तसेच लायन दिलीप जगताप, पियुष गोर, राजकुमार बाबर, उदय पवार, मनीषा भोसले, स्मिता कदम यांच्यासह अनेक लायन्स सदस्यांनी सक्रिय सहभाग घेतला.

या विशेष कार्यक्रमात लायन क्लब प्रशासक एम .जे .एफ महेश खुस्पे  यांनी ही उपस्थित राहून कार्यक्रमाला प्रेरणादायी साथ दिली. त्यांनी “वंदे मातरम्” गीत हे केवळ गाणे नसून भारतीय जनमानसातील देशभक्तीचा आत्मा आहे,” असे सांगून उपस्थितांना देशसेवेची प्रेरणा दिली.

या कार्यक्रमाच्या माध्यमातून देशभक्ती, ऐक्य आणि मातृभूमीविषयीची निष्ठा या मूल्यांचा जागर पुन्हा एकदा जनमानसात झाला. लायन्स क्लब आणि पोलीस प्रशासनाने केलेल्या या उपक्रमाचे सर्व स्तरातून कौतुक होत आहे.