“४५ वर्षांच्या अन्यायाविरोधात वाघेश्वर शेतकरी एकजूट; ऊस आयुक्तालयच्या लढ्यात मोठी तयारी!” *वाघेश्वर गावात शेतकऱ्यांचा मेळावा; रघुनाथदादा पाटील यांची भूमिका ठाम

 

कराड : विद्या मोरे 

पुणे येथे १२ डिसेंबर २०२५ रोजी होणाऱ्या साखर आयुक्तालयाचे नाव बदलून ऊस आयुक्तालय करण्याच्या राज्यव्यापी आंदोलनासाठी शेतकऱ्यांना मोठ्या प्रमाणावर सहभागी करून घेण्यासाठी महाराष्ट्रभर "जागरण सप्ताह" राबवला जात आहे. त्याच अनुषंगाने कराड तालुक्यातील मसूरजवळ असलेल्या वाघेश्वर पुनर्वसित गावात ८ डिसेंबर रोजी शेतकरी मेळावा उत्साहात पार पडला.

या मेळाव्याला शेतकरी संघटनेचे अध्यक्ष रघुनाथदादा पाटील, क्रांतिसिंह नाना पाटील ब्रिगेडचे महाराष्ट्र अध्यक्ष शिवाजी नाना नंदखिले, सातारा जिल्हाध्यक्ष अनिल (बापू) घराळ, कराड तालुका महिला अध्यक्ष वनिता महाडिक, तालुका अध्यक्ष वसीम इनामदार, कार्याध्यक्ष नजीर पटेल, वाघेश्वरचे सरपंच धीरज जाधव, तसेच मानसिंग पाटील, लाला पाटील, रमेश जाधव, नारायण जाधव, बाबुराव चौधरी, महेश शिंदे आणि परिसरातील शेतकरी मोठ्या संख्येने उपस्थित होते.

“महाराष्ट्रात शेतकऱ्यांचे खरे प्रतिनिधित्व हवे; ऊस आयुक्तालय ही काळाची गरज”

मेळाव्यात बोलताना रघुनाथदादा पाटील म्हणाले—

> “इतर राज्यांमध्ये ऊस आयुक्तालय असते, मात्र महाराष्ट्रातच साखर आयुक्तालय ठेवण्यात आले आहे, आणि हे आयुक्तालय बहुतेक वेळा कारखानदारांच्या हितासाठी काम करत आहे. ऊस उत्पादक शेतकऱ्यांचे संरक्षण आणि हक्कासाठी या कार्यालयाचे नाव बदलून ऊस आयुक्तालय हा पहिला आणि सर्वांत महत्त्वाचा टप्पा आहे.”

शेतकऱ्यांना १२ डिसेंबर रोजी पुण्यात होणाऱ्या आंदोलनासाठी मोठ्या संख्येने उपस्थित राहण्याचे आवाहन यावेळी करण्यात आले.

वाघेश्वरमध्ये शेतकरी संघटनेची नवीन शाखा सुरू

मेळाव्यात वाघेश्वर येथील शेतकऱ्यांच्या मागणीनुसार शेतकरी संघटनेची शाखा सुरू करण्यात आली. नव्याने नियुक्त पदाधिकारी पुढीलप्रमाणे—

अध्यक्ष : आनंदराव शिंदे

उपाध्यक्ष : महादेव जाधव

सचिव : कैलास शिंदे

खजिनदार : युवराज जाधव

⭐ वाघेश्वर गावाचा ४५ वर्षांचा संघर्ष अजूनही अपुरा

पुनर्वसनानंतर ४५ वर्षे उलटली तरी वाघेश्वर गावातील मूलभूत प्रश्न प्रलंबितच—

गावठाणाचे सातबारे नोंदणी अद्याप नाही

शेतीसाठी आवश्यक शेतरस्त्यांचा अभाव

शेतकऱ्यांना अन्याय्य अडवणूक, मनमानी अडथळे

या गंभीर प्रश्नांवर शेतकरी संघटना गावकऱ्यांच्या पू्र्ण पाठीशी राहील, असे रघुनाथदादा पाटील यांनी स्पष्टपणे सांगितले.