कराडचे सुपुत्र, ज्येष्ठ स्वातंत्र्यसैनिक वीर माधवराव जाधव (दादा) यांचा जन्मशताब्दी सोहळा १४ डिसेंबर रोजी

 

कराड : विद्या मोरे 

कराड भूमीत जन्मलेल्या आणि स्वातंत्र्यलढ्यात आपले संपूर्ण आयुष्य राष्ट्रसेवेस अर्पण करणाऱ्या ज्येष्ठ स्वातंत्र्यसैनिक वीर स्व. माधवराव नारायणराव जाधव (दादा) यांचा जन्म दि. १४ डिसेंबर १९२५ रोजी झाला. यंदा त्यांच्या जन्माला शंभर वर्षे पूर्ण होत असून, त्या ऐतिहासिक घटनेच्या स्मरणार्थ दि. १४ डिसेंबर २०२५ रोजी त्यांच्या जन्मशताब्दी सोहळ्याचे भव्य व गौरवपूर्ण आयोजन करण्यात आले आहे.

स्वातंत्र्यलढ्यातील अद्वितीय योगदान

भारतीय स्वातंत्र्यलढ्याच्या संघर्षमय काळात वीर माधवराव जाधव यांनी निर्भीड वृत्तीने ब्रिटिश सत्तेविरुद्ध लढा दिला. अत्यंत प्रतिकूल परिस्थितीतही त्यांनी देशाच्या स्वातंत्र्यासाठी स्वतःच्या सुखसोयी, कुटुंब व वैयक्तिक आयुष्याचा त्याग केला. स्वातंत्र्यलढ्यात त्यांनी केलेले कार्य, दाखवलेले धैर्य आणि सहन केलेले हालअपेष्टा आजही नव्या पिढीसाठी प्रेरणास्थान आहेत. त्यांच्या भीम पराक्रमामुळे कराडचे नाव राष्ट्रीय पातळीवर गौरवाने घेतले जाते.

स्वातंत्र्योत्तर काळातील समाजघडण

स्वातंत्र्य मिळाल्यानंतरही वीर माधवराव जाधव यांची राष्ट्रसेवा थांबली नाही. स्वातंत्र्योत्तर काळात कराड शहराच्या तसेच संपूर्ण राज्याच्या सामाजिक, शैक्षणिक, सहकार आणि सार्वजनिक जीवनाच्या जडणघडणीत त्यांनी महत्त्वाची भूमिका बजावली. प्रामाणिकपणा, साधेपणा आणि लोकसेवेची तळमळ या मूल्यांवर त्यांनी आपले सार्वजनिक जीवन घडवले.

जन्मशताब्दी सोहळ्याचे आयोजन

या जन्मशताब्दीच्या औचित्याने दि. १४ डिसेंबर रोजी सायंकाळी ५.०० वाजता,

शताब्दी सभागृह, कराड अर्बन को-ऑपरेटिव्ह बँक मुख्यालय, कराड येथे विशेष स्मरण सोहळ्याचे आयोजन करण्यात आले आहे.

या सोहळ्यास मा. पृथ्वीराज चव्हाण (माजी मुख्यमंत्री, महाराष्ट्र राज्य) हे प्रमुख उपस्थित राहणार असून, कार्यक्रमाला राजकीय, सामाजिक, शैक्षणिक आणि सहकार क्षेत्रातील अनेक मान्यवर उपस्थित राहणार आहेत. यामध्ये मा. डॉ. वैशाली ईश्वर कडकर, मा. सुभाषराव जोशी, मा. डॉ. सुभाष एरम , मा. चैतन्य कणसे, मा. समीर जोशी आदींचा समावेश आहे.

चित्रफीत व मनोगतांचा कार्यक्रम

या स्मरण सोहळ्यात वीर माधवराव जाधव यांच्या जीवनप्रवासावर आधारित माहितीपट (चित्रफीत) प्रदर्शन आयोजित करण्यात आले असून, त्यांच्या संघर्षमय जीवनाची, स्वातंत्र्यलढ्यातील योगदानाची आणि समाजसेवेची ओळख नव्या पिढीला करून देण्यात येणार आहे. यासोबतच उपस्थित मान्यवरांकडून वीर माधवराव जाधव यांच्या कार्यावर आधारित मनोगते व्यक्त केली जाणार आहेत.

नागरिकांना आवाहन

स्वातंत्र्य, त्याग आणि राष्ट्रनिष्ठेचे प्रतीक असलेल्या वीर माधवराव जाधव यांच्या स्मृतींना अभिवादन करण्यासाठी आणि त्यांच्या कार्यातून प्रेरणा घेण्यासाठी या ऐतिहासिक जन्मशताब्दी सोहळ्यास कराड शहरातील तसेच परिसरातील नागरिकांनी, युवकांनी, विद्यार्थ्यांनी व स्वातंत्र्यप्रेमींनी मोठ्या संख्येने उपस्थित राहावे, असे आवाहन वीर माधवराव जाधव जन्मशताब्दी संयोजन समिती यांच्या वतीने करण्यात आले आहे.