जनतेच्या विश्वासाचा कौल! प्रभाग क्रमांक २ ब मधून सुहास संभाजी पवार यांचा ऐतिहासिक विजय

 

कराड : विद्या मोरे

प्रभाग क्रमांक २ ब मधील नगरपरिषद निवडणुकीत लोकशाही आघाडीचे उमेदवार सुहास संभाजी पवार यांनी १४५९ मतांची भक्कम आघाडी घेत दणदणीत आणि ऐतिहासिक विजय संपादन केला. हा विजय केवळ एका उमेदवाराचा नसून, तो सामान्य जनतेच्या आशा-आकांक्षांचा, विश्वासाचा आणि विकासाच्या अपेक्षांचा बुलंद आवाज ठरला आहे.

निकाल जाहीर होताच प्रभागात आनंदाचे वातावरण निर्माण झाले. कार्यकर्त्यांच्या डोळ्यांत समाधानाचे अश्रू तर नागरिकांच्या चेहऱ्यावर आशेचे हास्य दिसत होते. हा क्षण प्रभागातील प्रत्येक कुटुंबाशी जोडलेला होता.

विजयानंतर भावना व्यक्त करताना सुहास संभाजी पवार म्हणाले,

“हा विजय माझा वैयक्तिक नाही. हा विजय माझ्या प्रभागातील प्रत्येक माय-बहिणीचा, प्रत्येक कष्टकरीचा, युवकाचा आणि ज्येष्ठ नागरिकाचा आहे. जनतेने माझ्यावर दाखवलेला विश्वास ही माझ्यासाठी जबाबदारी असून, त्या विश्वासाशी कधीही प्रतारणा होऊ देणार नाही.”

ते पुढे म्हणाले की, रस्ते, पाणीपुरवठा, स्वच्छता, आरोग्य सुविधा, सीसीटीव्ही व्यवस्था आणि युवकांसाठी रोजगाराच्या संधी या केवळ आश्वासनांचा विषय नसून, त्या प्रत्यक्षात उतरवण्याची वेळ आता सुरू झाली आहे.

“प्रभागातील शेवटच्या घटकापर्यंत विकास पोहोचवणे, कोणताही भेदभाव न करता काम करणे आणि जनतेची वेदना सभागृहात ठामपणे मांडणे हेच माझे जीवनकार्य राहील,” असे भावनिक शब्दांत त्यांनी सांगितले.

या विजयामागे लोकशाही आघाडीतील नेते, पदाधिकारी आणि निष्ठावान कार्यकर्त्यांनी केलेले प्रामाणिक प्रयत्न, घराघरातील संवाद आणि जनतेशी जपलेले विश्वासाचे नाते कारणीभूत ठरले असल्याचे नागरिकांकडून बोलले जात आहे.

अखेर, सुहास संभाजी पवार यांनी मतदार, कार्यकर्ते आणि समर्थकांचे डोळे भरून येतील अशा शब्दांत आभार मानत म्हटले,

“हा जनादेश सत्तेसाठी नसून सेवेसाठी आहे. हा विश्वास माझ्या प्रत्येक कृतीत दिसेल. प्रभाग क्रमांक २ ब साठी मी सदैव तत्पर राहीन.”