श्री शिवाजी विद्यालय, कराड येथे वार्षिक स्नेहसंमेलन व पारितोषिक वितरण सोहळा उत्साहात संपन्न

कराड : विद्या मोरे 

श्री शिवाजी विद्यालय, कराड यांचे वार्षिक स्नेहसंमेलन व पारितोषिक वितरण समारंभ अत्यंत उत्साहपूर्ण आणि आनंदमय वातावरणात पार पडला. यावेळी विद्यार्थ्यांनी सादर केलेले विविध सांस्कृतिक तसेच गुणदर्शनाचे कार्यक्रम आणि वर्षभरात उल्लेखनीय कामगिरी करणाऱ्या विद्यार्थ्यांचा सत्कार हा सोहळ्याचा मुख्य आकर्षण ठरला.

समारंभाचे प्रमुख पाहुणे मा. श्री. दीपक शंकरराव डांगे पाटील होते. तर कार्यक्रमाच्या अध्यक्षस्थानी श्री शिवाजी शिक्षण संस्था ट्रस्ट, कराड यांचे खजिनदार मा. श्री. संजय पुरुषोत्तम बदियाणी विराजमान होते. तसेच संस्थेचे अध्यक्ष मा. श्री. जयंत काका पाटील, संचालक मा. श्री. राजेंद्र माने, मुख्याध्यापक श्री टी. डी. जाधव यांच्यासह मान्यवरांची गौरवशाली उपस्थिती होती.

कार्यक्रमाची सुरुवात दीपप्रज्वलनाने झाली. त्यानंतर स्वागतगीत व शालेय उपक्रमांचा संक्षिप्त आढावा सादर करण्यात आला. शाळेचे मुख्याध्यापक श्री टी. डी. जाधव यांनी वार्षिक अहवाल सादर करताना शैक्षणिक, क्रीडा, सांस्कृतिक व सामाजिक क्षेत्रातील शाळेच्या उल्लेखनीय कामगिरीचा आढावा उपस्थितांसमोर मांडला.

आपल्या प्रभावी मनोगतात मा. दीपक डांगे पाटील म्हणाले की,

“विद्यार्थ्यांनी मोबाईलपासून दूर राहून आरोग्य, व्यायाम व खेळ याकडे लक्ष देणे अत्यावश्यक आहे. पालकांचा सन्मान, त्यांचे मार्गदर्शन आणि शिक्षकांचा आदर ही यशाची गुरुकिल्ली आहे.”

तसेच त्यांनी स्व. यशवंतराव चव्हाण आणि आ. पी. डी. पाटील साहेब यांच्या कार्याचा संदर्भ देत कराडच्या प्रगतशील शैक्षणिक परंपरेचे महत्व अधोरेखित केले. विद्यार्थ्यांच्या प्रतिभा, शिस्तबद्धता आणि आत्मविश्वासाचेही त्यांनी कौतुक केले.

यानंतर प्रमुख मान्यवरांच्या हस्ते विविध स्पर्धा, सांस्कृतिक कार्यक्रम, क्रीडा तसेच शैक्षणिक गुणवत्तेत नेत्रदीपक यश संपादन करणाऱ्या विद्यार्थ्यांना पारितोषिके, प्रमाणपत्रे आणि स्मृतिचिन्हे प्रदान करण्यात आली.

यामुळे संपूर्ण वातावरणात आनंदाचा उत्सव उसळला.

पारितोषिक वितरणानंतर विद्यार्थ्यांनी सादर केलेल्या विविध नृत्याविष्कार, देशभक्तीपर गीते, नाटिका, कथाकथन आणि पारंपरिक कला सादरीकरणाने उपस्थितांची मनं जिंकली. प्रत्येक सादरीकरणाला प्रेक्षकांकडून भरभरून दाद मिळाली.

समारंभाचे सूत्रसंचालन शिक्षकांनी तर आभारप्रदर्शन शाळेच्या प्रतिनिधींनी केले.

या सोहळ्याला शाळेचे शिक्षक, शिक्षकेतर कर्मचारी, माजी विद्यार्थी, पालक आणि नागरिक मोठ्या संख्येने उपस्थित होते. कार्यक्रमाच्या यशस्वी आयोजनासाठी संपूर्ण शाळा परिवाराने परिश्रम घेतले.