साताऱ्यात मुख्यमंत्री फडणवीस यांच्या हस्ते भाजप नगरसेवकांचा सत्कार; कराडसह जिल्ह्यातील ७ नगराध्यक्षांचा गौरव

कराड : विद्या मोरे

साताऱ्यात आज मुख्यमंत्री देवेंद्र फडणवीस यांच्या हस्ते कराडसह सातारा जिल्ह्यातील भाजपच्या नूतन नगरसेवकांचा आणि निवडून आलेल्या नगराध्यक्षांचा भव्य सत्कार करण्यात आला. अलीकडील स्थानिक स्वराज्य संस्थांच्या निवडणुकांमध्ये भाजपला मिळालेल्या यशाच्या पार्श्वभूमीवर हा सत्कार सोहळा आयोजित करण्यात आला होता.

मुख्यमंत्री देवेंद्र फडणवीस हे अखिल भारतीय मराठी साहित्य संमेलनाचे उद्घाटन करण्यासाठी साताऱ्यात दाखल झाले होते. संमेलनाचे उद्घाटन केल्यानंतर त्यांनी थेट जिल्हा परिषद हॉल येथे आयोजित सत्कार कार्यक्रमाला उपस्थिती दर्शवली. या कार्यक्रमात भाजपच्या विजयी नगरसेवकांचा आणि जिल्ह्यातील ७ नगराध्यक्षांचा शाल, श्रीफळ व पुष्पगुच्छ देऊन सत्कार करण्यात आला.

यावेळी उपस्थित नगरसेवकांचे अभिनंदन करताना मुख्यमंत्री फडणवीस म्हणाले की,
“जनतेचा विश्वास हीच सर्वात मोठी शक्ती आहे. स्थानिक स्वराज्य संस्थांमध्ये काम करताना पारदर्शकता, विकासाभिमुख विचार आणि नागरिकांशी सातत्यपूर्ण संपर्क यांना प्राधान्य द्या.”

या सत्कार सोहळ्याला आमदार डॉ. अतुल भोसले, मंत्री शिवेंद्रसिंहराजे भोसले, माजी मंत्री जयकुमार गोरे आदी मान्यवर तसेच भाजपचे पदाधिकारी आणि कार्यकर्ते मोठ्या संख्येने उपस्थित होते. कार्यक्रमामुळे संपूर्ण परिसरात उत्साहाचे आणि आनंदाचे वातावरण निर्माण झाले होते.

कार्यक्रमादरम्यान भाजपच्या स्थानिक नेतृत्वानेही कराड आणि सातारा जिल्ह्यातील प्रलंबित विकासकामे, नागरिकांसाठी सुरू असलेल्या योजना आणि आगामी विकास आराखडे यांवर थोडक्यात प्रकाश टाकला. नव्या नगरसेवकांनी लोकांच्या अपेक्षांनुसार काम करण्याची ग्वाही दिली.

एकूणच, भाजपच्या संघटनात्मक बळकटीसोबतच स्थानिक स्वराज्य संस्थांतील राजकीय यश साजरे करणारा हा सत्कार सोहळा भव्य आणि उत्साहपूर्ण वातावरणात पार पडला.

---