यशवंत सहकारी बँकेतील ११२ कोटींच्या कथित गैरव्यवहाराची सखोल चौकशी व्हावी; भाजपच्या ज्येष्ठ कार्यकर्त्यांचे तहसिलदारांना निवेदन

 कराड  : विद्या मोरे 

 फलटण–कराड येथील यशवंत सहकारी बँकेत तब्बल ११२ कोटी रुपयांच्या कथित गैरव्यवहाराचे प्रकरण समोर आले असून या प्रकरणी सखोल आणि निष्पक्ष चौकशी करण्यात यावी, अशी मागणी भारतीय जनता पक्षाच्या ज्येष्ठ व जुने कार्यकर्त्यांनी तहसिलदारांकडे निवेदनाद्वारे केली आहे.

तत्कालीन चेअरमनवर मनमानी कारभाराचा आरोप

निवेदनात असे नमूद करण्यात आले आहे की, या बँकेचे तत्कालीन चेअरमन शेखर चरेगांवकर यांनी रिझर्व्ह बँकेचे नियम व सहकार कायद्याच्या तरतुदींची पायमल्ली केली असून संचालक मंडळाला विश्वासात न घेता मनमानी निर्णय घेतले, असा आरोप करण्यात आला आहे. या सर्व घडामोडींमुळेच एवढ्या मोठ्या प्रमाणात आर्थिक अनियमितता झाल्याचा दावा निवेदनात करण्यात आला आहे.

पुढे असेही म्हटले आहे की, चरेगांवकर यांचे भाऊही या कथित व्यवहारांमध्ये सहभागी होते. सध्या ते तुरुंगात असले तरी त्यांना व्हीआयपी सुविधा मिळत असल्याचा आरोप कार्यकर्त्यांनी केला असून ही सुविधा तात्काळ बंद करण्याची मागणी करण्यात आली आहे.

सहकार परिषदेवरील नियुक्तीवर प्रश्नचिन्ह

निवेदनात, शेखर चरेगांवकर यांचा भारतीय जनता पार्टी किंवा राष्ट्रीय स्वयंसेवक संघाशी कोणताही राजकीय वा संघटनात्मक संबंध नसताना त्यांना सहकार परिषदेचे अध्यक्षपद व राज्यमंत्री दर्जा कसा मिळाला, यावर प्रश्न चिन्ह उपस्थित करण्यात आले आहे. ही नियुक्ती कोणाच्या शिफारसीवर झाली आणि त्यामागील कारणे काय होती याची सखोल चौकशी व्हावी, अशी मागणी करण्यात आली आहे.

मा. चंद्रकांतदादा पाटील यांच्या कर्जप्रकरणाचीही चौकशीची मागणी

त्याकाळी सहकार मंत्री असलेले विद्यमान मंत्री मा. चंद्रकांतदादा पाटील यांनी कराड येथील जनकल्याण पतसंस्थेकडून सुमारे २ कोटी रुपयांचे कर्ज घेतले होते, असा दावा निवेदनात करण्यात आला आहे. हे कर्ज फेडण्यासाठी शेखर चरेगांवकर यांचा उपयोग झाला का? त्याबदल्यात त्यांना सहकार परिषदेचे अध्यक्षपद देण्यात आले का? — याबाबत तपास करण्यात यावा, अशी मागणी कार्यकर्त्यांनी केली आहे.

ई.डी.मार्फत तपास सुरू करण्याची मागणी

या संपूर्ण प्रकरणाची सत्यता उघड होण्यासाठी मुख्यमंत्री महोदयांनी अंमलबजावणी संचालनालयाकडून (ईडी) चौकशी सुरू करावी, अशी खास मागणी निवेदनात करण्यात आल्याचे समजते.

चौकशी व्हावी, जबाबदारी निश्चित व्हावी — कार्यकर्त्यांची भूमिका

निवेदन सादर करणारे भाजपचे जुने कार्यकर्ते म्हणतात की,

“आम्ही २००८ साली पदवीधर मतदारसंघातील निवडणूक जिंकवून देण्यासाठी मा. चंद्रकांतदादा पाटील यांच्यासाठी प्रामाणिक मेहनत घेतली. त्यामुळे आमचा कोणावर वैयक्तिक द्वेष नाही. पण जनसामान्यांचे कोट्यवधी रुपये धोक्यात असताना प्रामाणिक चौकशी व्हायलाच हवी,”
असा त्यांच्या भावना निवेदनातून व्यक्त करण्यात आल्या आहेत.

तसेच,
• मा. चंद्रकांतदादा पाटील यांना मंत्रिमंडळातून वगळण्यात यावे,
• शेखर चरेगांवकर यांच्या सर्व स्थावर व जंगम मालमत्तेवर राज्य सरकारने ताबा घ्यावा,
• आरोपींना तुरुंगात व्हीआयपी सुविधा देणे थांबवावे,
अशा मागण्या दिवशी करण्यात आल्या आहेत.

निवेदन विविध यंत्रणांकडे पाठविले

हे निवेदन तहसिलदारांसोबतच जिल्हाधिकारी, उपविभागीय पोलीस अधिकारी आणि कराड शहर पोलिस ठाणे यांनाही प्रत स्वरूपात पाठविण्यात आले आहे.

या प्रकरणाविषयी संबंधितांकडून मात्र अद्याप अधिकृत प्रतिक्रिया मिळालेली नाही.