प्रभाग क्रमांक ३ मध्येनागरी प्रश्नांवर हक्काची बैठक ठोस निर्णयांसाठी थेट संवाद .नवनिर्वाचित नगरसेवक श्री. प्रवीण प्रल्हाद पवार आणि नगरसेविका रजिया दाऊद आंबेकरी यांच्या नेतृत्वाखाली

 

कराड:  विद्या मोरे 

प्रभाग क्रमांक ३ मधील नागरिकांना गेल्या अनेक वर्षांपासून भेडसावणाऱ्या मूलभूत नागरी समस्या, प्रलंबित विकासकामे आणि दुर्लक्षित प्रश्नांवर ठोस तोडगा काढण्यासाठी हक्काची बैठक आयोजित करण्यात आली आहे. नवनिर्वाचित नगरसेवक श्री. प्रवीण प्रल्हाद पवार (आप्पा) आणि नगरसेविका रजिया दाऊद आंबेकरी यांच्या नेतृत्वाखाली ही बैठक गुरुवार, दिनांक 15 जानेवारी 2026 रोजी सायंकाळी 6 वाजता कृष्णकुंज फार्म हाऊस येथे होणार आहे.

प्रभागातील नागरिकांना अनियमित पाणीपुरवठा, खड्डेमय व अपूर्ण रस्ते, ड्रेनेज व सांडपाणी तुंबण्याच्या समस्या, वीजपुरवठ्यातील वारंवार खंडितता, स्वच्छतेचा अभाव, कचरा उचल व व्यवस्थापनातील त्रुटी, तसेच नागरी सुविधांच्या कमतरतेमुळे होणारा त्रास या समस्यांना रोज सामोरे जावे लागत आहे. या पार्श्वभूमीवर केवळ तक्रारी ऐकून न घेता, प्रश्नांची मुळापासून चर्चा करून ठोस व कालबद्ध निर्णय घेण्याच्या उद्देशाने ही बैठक आयोजित करण्यात आली आहे.

या बैठकीत नागरिकांना थेट आपली समस्या मांडण्याची संधी, लोकप्रतिनिधींनी प्रत्यक्ष उत्तर देणे, तसेच प्रशासनाशी समन्वय साधून तात्काळ उपाययोजना ठरवणे यावर विशेष भर दिला जाणार आहे. विकासकामांचे नियोजन, प्राधान्यक्रम ठरवणे, निधीचा योग्य वापर आणि कामांची पारदर्शक अंमलबजावणी हेही या बैठकीतील महत्त्वाचे मुद्दे असणार आहेत.

या हक्काच्या बैठकीस प्रभाग क्रमांक ३ मधील सर्व जागरूक नागरिक, युवक, महिला, ज्येष्ठ नागरिक, सामाजिक कार्यकर्ते, विविध संघटनांचे पदाधिकारी व लोकहितासाठी कार्य करणाऱ्या व्यक्तींनी मोठ्या संख्येने उपस्थित राहावे, असे आवाहन करण्यात आले आहे. नागरिकांचा सहभाग हाच विकासाचा खरा पाया असून, लोकप्रतिनिधी व जनता यांच्यातील थेट संवादातून विश्वास, पारदर्शकता आणि जबाबदारीची भावना निर्माण होईल, असा विश्वास व्यक्त करण्यात येत आहे.

प्रभाग क्रमांक ३ च्या सर्वांगीण, नियोजित आणि शाश्वत विकासासाठी ही बैठक एक महत्त्वपूर्ण टप्पा ठरेल, तसेच परिवर्तनाची ठोस सुरुवात होईल, अशी अपेक्षा नागरिकांकडून व्यक्त केली जात आहे.