📰 श्रद्धा, निष्ठा आणि विजयाचा संगम; कार्यकर्त्याची सायकल यात्रा चर्चेतपाली येथील खंडोबारायांच्या दर्शनाने प्रारंभ; शिवतीर्थ, कराड मार्गे जोतिबा दर्शनासाठी कोल्हापूरकडे प्रस्थान

शिवतीर्थ | कराड : विद्या मोरे

कोपर्डे हवेली जिल्हा परिषद गटातील अपक्ष उमेदवार सौ. विद्या रामकृष्ण वेताळ यांच्या विजयासाठी घेतलेल्या नवसाची पूर्तता करण्यासाठी मा. भूषण शंकरराव शेजवळ यांनी सायकल प्रवास सुरू केला असून, त्यांच्या या उपक्रमाची परिसरात सर्वत्र चर्चा होत आहे.

निवडणूक काळात कार्यकर्त्यांनी दिवस-रात्र न पाहता केलेल्या प्रचार, जनसंपर्क आणि संघटनात्मक प्रयत्नांमुळे हा विजय शक्य झाला. त्या विजयाबद्दल कृतज्ञता व्यक्त करत नवसपूर्तीसाठी श्री क्षेत्र पाली येथे श्री खंडोबारायांचे दर्शन घेऊन मा. शेजवळ यांनी सायकल प्रवासास प्रारंभ केला.

श्रद्धा आणि निष्ठेच्या भावनेतून सुरू झालेला हा प्रवास शिवतीर्थ, कराड येथे आगमनानंतर छत्रपती शिवरायांच्या पुतळ्यास अभिवादन करून पुढे श्री क्षेत्र जोतिबा, कोल्हापूर येथे दर्शनासाठी मार्गस्थ झाला. मार्गातील विविध ठिकाणी नागरिक व कार्यकर्त्यांनी त्यांचे उत्स्फूर्त स्वागत करून शुभेच्छा दिल्या.

शिवतीर्थ येथे झालेल्या स्वागत प्रसंगी उपस्थित मान्यवरांनी त्यांच्या या निस्वार्थ कृतीचे कौतुक केले. हा प्रवास केवळ अंतराचा नसून, विजयासाठी प्रत्येक कार्यकर्त्याने घेतलेल्या परिश्रम, वेदना आणि समर्पणाचे प्रतीक असल्याची भावना यावेळी व्यक्त करण्यात आली.

अशा निष्ठावंत व समर्पित कार्यकर्त्यांमुळे नेतृत्व अधिक सक्षम होते आणि लोकशक्तीला बळ मिळते, असे मत उपस्थितांनी व्यक्त केले. मा. भूषण शंकरराव शेजवळ यांच्या पुढील प्रवासासाठी शुभेच्छा देत तो सुखरूप व मंगलमय होवो, अशी प्रार्थना करण्यात आली.