🌾 शेतकऱ्यांच्या नेतृत्वाला नवा चेहरा महाराष्ट्र भाजपा किसान मोर्चाच्या प्रदेशाध्यक्षपदी रामकृष्ण वेताळ

कराड  : विद्या मोरे :

राज्यातील शेतकरी चळवळीला नवे बळ देणारा आणि संघटनात्मक राजकारणात महत्त्वाचा मानला जाणारा निर्णय जाहीर झाला असून, कराड उत्तरचे अभ्यासू, संयमी आणि तळागाळाशी नाळ जपणारे नेतृत्व म्हणून ओळख असलेले रामकृष्ण वेताळ यांची भाजपा किसान मोर्चाच्या महाराष्ट्र प्रदेशाध्यक्षपदी नियुक्ती करण्यात आली आहे. ग्रामीण भागातील प्रश्नांना प्राधान्य देत सातत्याने पाठपुरावा करणाऱ्या नेतृत्वावर पक्षश्रेष्ठींनी दाखवलेला विश्वास हा त्यांच्या कार्यपद्धतीची पोचपावती मानला जात आहे. या निर्णयामुळे सातारा जिल्ह्यासह राज्यभरातील कार्यकर्त्यांमध्ये उत्साहाचे वातावरण निर्माण झाले आहे.

संघटनकौशल्याची ठोस छाप

रामकृष्ण वेताळ यांनी किसान मोर्चामध्ये विविध जबाबदाऱ्या सांभाळताना प्रभावी कामगिरीची नोंद केली आहे. प्रदेश सरचिटणीस, सातारा जिल्हा उपाध्यक्ष तसेच कराड शेती उत्पन्न बाजार समितीचे संचालक म्हणून काम करताना त्यांनी शेतकऱ्यांच्या दैनंदिन अडचणींपासून ते धोरणात्मक प्रश्नांपर्यंत सातत्याने भूमिका मांडली. हमीभाव, सिंचन व्यवस्था, पिकविमा, शेतीमालाच्या बाजारपेठेतील चढउतार आणि कर्जप्रश्न यांसारख्या मुद्द्यांवर त्यांनी सक्रिय पाठपुरावा केला. त्यांच्या संघटनशैलीत संवाद, समन्वय आणि शिस्त यांचा प्रभावी संगम दिसून येतो.

तळागाळाशी घट्ट नाळ

कराड उत्तर विधानसभा मतदारसंघात त्यांनी उभारलेले संघटन हे त्यांच्या नेतृत्वाचे ठळक उदाहरण मानले जाते. गावपातळीवरील बैठका, शेतकरी मेळावे, कार्यकर्त्यांशी सातत्यपूर्ण संपर्क आणि युवकांना संधी देण्याची भूमिका यामुळे त्यांनी स्थानिक पातळीवर मजबूत पाया रचला. त्यांच्या कार्यपद्धतीमुळे पक्ष संघटनेला नवे बळ मिळाल्याचे कार्यकर्ते सांगतात.

नव्या जबाबदारीतून व्यापक अपेक्षा

प्रदेशाध्यक्ष म्हणून राज्यातील शेतकरी व शेतीविषयक प्रश्न अधिक प्रभावीपणे मांडण्याचा त्यांचा निर्धार आहे. बदलते हवामान, वाढता उत्पादन खर्च, बाजारपेठेतील अस्थिरता, तांत्रिक बदलांची गरज आणि शाश्वत शेतीचे आव्हान या मुद्द्यांवर संघटित आणि ठोस भूमिका घेण्याची आवश्यकता त्यांनी अधोरेखित केली आहे. किसान मोर्चाच्या माध्यमातून शासनदरबारी शेतकऱ्यांचा आवाज सक्षमपणे पोहोचवण्याची भूमिका ते निभावतील, अशी अपेक्षा व्यक्त होत आहे.

मान्यवरांकडून शुभेच्छांचा वर्षाव

या नियुक्तीबद्दल राज्यातील विविध मान्यवरांनी त्यांचे अभिनंदन केले आहे. मुख्यमंत्री देवेंद्र फडणवीस, प्रदेशाध्यक्ष रविंद्र चव्हाण, चंद्रशेखर बावनकुळे, उच्च व तंत्र शिक्षण मंत्री चंद्रकांत पाटील, सार्वजनिक बांधकाम मंत्री शिवेंद्रसिंहराजे भोसले, ग्रामविकास मंत्री जयकुमार गोरे, सातारा लोकसभा मतदारसंघाचे खासदार उदयनराजे भोसले, आमदार डॉ. अतुल भोसले तसेच माजी खासदार रणजितसिंह नाईक निंबाळकर यांनी शुभेच्छा दिल्या आहेत.

“विश्वासाला न्याय देणार”

“प्रदेशाध्यक्षपदाची जबाबदारी ही केवळ पद नसून शेतकऱ्यांच्या अपेक्षांची जबाबदारी आहे. वरिष्ठांनी दाखवलेला विश्वास पूर्णत्वास नेण्यासाठी मी सर्वतोपरी प्रयत्न करीन. शेतकरी आणि शेतीसंबंधीच्या प्रश्नांवर सातत्याने काम करून ठोस उपाययोजना राबविण्यावर माझा भर असेल,” असे रामकृष्ण वेताळ यांनी स्पष्ट केले.

राज्यातील किसान मोर्चाचे कार्य अधिक परिणामकारक आणि आदर्श ठरेल, असा विश्वास त्यांनी व्यक्त केला. त्यांच्या नेतृत्वाखाली शेतकरी चळवळीला नवी दिशा आणि नवी ऊर्जा मिळेल, अशी अपेक्षा व्यक्त होत आहे.