जिल्ह्यात पेट्रोल-डिझेल-गॅस पुरेसा साठा; अफवा पसरवणाऱ्यांना कडक इशारा — पालकमंत्री शंभूराजे देसाई

कराड : विद्या मोरे

 जिल्ह्यात पेट्रोल, डिझेल व एलपीजी गॅसचा पुरेसा साठा असून कोणत्याही प्रकारची टंचाई नाही, असे पालकमंत्री शंभूराजे देसाई यांनी नागरिकांना ठणकावून सांगितले. अफवांवर विश्वास ठेवू नका आणि अनावश्यक साठेबाजी करू नका, असे त्यांनी स्पष्ट आवाहन केले.

जिल्हाधिकारी कार्यालयात झालेल्या आढावा बैठकीत पालकमंत्री देसाई यांनी पेट्रोल पंप, गॅस एजन्सी, आणि जीवनावश्यक वस्तूंच्या पुरवठ्याबाबत सविस्तर माहिती घेतली. यावेळी जिल्हाधिकारी संतोष पाटील, पोलीस अधीक्षक तुषार दोशी, उपवनसंरक्षक अमोल सातपुते, अपर जिल्हाधिकारी मल्लीकार्जून माने, जिल्हा पुरवठा अधिकारी वैशाली राजमाने यांसह सर्व प्रांताधिकारी आणि तेल कंपन्यांचे प्रतिनिधी उपस्थित होते.

पालकमंत्री शंभूराजे देसाई म्हणाले, “जिल्ह्यात पेट्रोल, डिझेल व एलपीजी गॅसचा साठा पुरेसा आहे. रिफिलिंगची व्यवस्था अखंड सुरू असून कोणत्याही क्षेत्रात टंचाई नाही. नागरिकांनी अफवांवर विश्वास न ठेवता फक्त आवश्यकतेनुसारच इंधन किंवा गॅस वापरावे. घरात कॅनमध्ये इंधन साठवणे अत्यंत धोकादायक आहे. परिस्थिती प्रशासनाच्या नियंत्रणाखाली आहे.”

जिल्ह्यात भारत पेट्रोलियमचे 99, हिंदुस्तान पेट्रोलियमचे 102 आणि इंडियन ऑइलचे 136 पेट्रोल पंप कार्यरत आहेत. तसेच 89 गॅस एजन्सी 9.64 लाखांहून अधिक ग्राहकांना नियमित सेवा देत आहेत. या पुरवठ्यामुळे कुठेही टंचाई होण्याची शक्यता नाही, असे प्रशासन स्पष्ट करते.

साठेबाजी आणि काळाबाजार रोखण्यासाठी तहसील स्तरावर भरारी पथके तैनात केली गेली आहेत. १ मार्च ते २५ मार्च दरम्यान जिल्ह्यात 640 ठिकाणी धाड्या घेऊन काळाबाजारीवर कारवाई करण्यात आली. प्रशासनाची नजरेखाली असलेल्या या पथकांनी काळाबाजारी करणाऱ्या कोणत्याही व्यक्तीवर त्वरित कारवाई केली आहे.

पालकमंत्री शंभूराजे देसाई म्हणाले, “जिल्ह्यात जीवनावश्यक वस्तूंचा पुरवठा सुरळीत चालू आहे. अफवांवर विश्वास ठेवू नका. फक्त आवश्यकतेनुसारच इंधन किंवा गॅस वापरा. अनावश्यक साठेबाजी केल्यास प्रशासन कठोर कारवाई करेल. नागरिकांनी संयम राखून सरकारी सूचना आणि अधिकृत माहितीवरच विश्वास ठेवावा.”

त्यांनी लोकांना सांगितले की, केंद्र शासनाच्या मार्गदर्शक सूचनांनुसार तेल कंपन्यांनी जिल्ह्यातील वितरकांना सहकार्य करणे सुनिश्चित केले आहे, ज्यामुळे जीवनावश्यक वस्तूंचा पुरवठा अखंड चालू राहील. नागरिकांनी अफवा पसरवणाऱ्या सोशल मीडिया पोस्टपासून दूर राहावे आणि सरकारी माध्यमांवरूनच माहिती घेणे सुरक्षित ठरेल.