ओगलेवाडीत वेताळ दाम्पत्याचा भव्य जाहीर सत्कार सोहळा प्रदेशाध्यक्ष व जिल्हा परिषद सदस्यपदी निवडीबद्दल नागरिकांकडून उत्स्फूर्त स्वागत

कराड : विद्या मोरे

ओगलेवाडी (सदाशिवगड) येथील नवभारत गणेश मंडळ ट्रस्ट व स्थानिक नागरिकांच्या वतीने मा. श्री. रामकृष्ण वेताळ  यांची भारतीय जनता पार्टी किसान मोर्चा, महाराष्ट्र प्रदेशाध्यक्ष पदी निवड झाल्याबद्दल तसेच सौ. विद्या रामकृष्ण वेताळ यांची जिल्हा परिषद सदस्य, सातारा पदी निवड झाल्याबद्दल भव्य जाहीर सत्कार सोहळ्याचे आयोजन करण्यात आले. कार्यक्रमास स्थानिक नागरिकांनी मोठ्या संख्येने उपस्थित राहून उत्स्फूर्त प्रतिसाद दिला.

कार्यक्रमाच्या प्रारंभी श्री गणरायाच्या मूर्तीसमोर दीपप्रज्वलन करून मान्यवरांनी मनोभावे दर्शन घेतले व आशीर्वाद प्राप्त केले. त्यानंतर नवभारत गणेश मंडळ ट्रस्टच्या वतीने मान्यवरांचे पुष्पगुच्छ देऊन स्वागत करण्यात आले. उपस्थितांच्या टाळ्यांच्या कडकडाटात श्री. रामकृष्ण वेताळ व सौ. विद्या रामकृष्ण वेताळ यांचा शाल, श्रीफळ, सन्मानचिन्ह व पुष्पहार घालून सत्कार करण्यात आला.

यावेळी बोलताना श्री. रामकृष्ण वेताळ यांनी आपल्या निवडीमागे पक्ष नेतृत्व, कार्यकर्ते आणि नागरिकांचे मोलाचे योगदान असल्याचे सांगून सर्वांचे मनःपूर्वक आभार मानले. राज्यातील शेतकरी बांधवांच्या समस्या सोडविण्यासाठी आणि त्यांच्या हक्कांसाठी सातत्याने आवाज उठविण्याचा तसेच शेतकरी हिताच्या विविध योजनांचा प्रभावी पाठपुरावा करण्याचा निर्धार त्यांनी व्यक्त केला. “किसान मोर्चाच्या माध्यमातून शेतकऱ्यांच्या प्रश्नांना प्राधान्य देऊन त्यांचे जीवनमान उंचावण्यासाठी प्रयत्नशील राहू,” असेही ते म्हणाले.

सौ. विद्या रामकृष्ण वेताळ यांनी जिल्हा परिषद सदस्य म्हणून मतदारसंघातील सर्वांगीण विकासासाठी कटिबद्ध राहण्याची ग्वाही दिली. पाणीपुरवठा योजना, ग्रामीण रस्त्यांचे मजबुतीकरण, शैक्षणिक सुविधा, महिला सक्षमीकरण आणि आरोग्यसेवा यांसारख्या मूलभूत प्रश्नांवर विशेष भर देणार असल्याचे त्यांनी स्पष्ट केले. नागरिकांनी दाखविलेल्या विश्वासाला न्याय देण्यासाठी प्रामाणिकपणे काम करण्याचा संकल्प त्यांनी व्यक्त केला.

या प्रसंगी श्री. सुरेश खोचरे, मा. पं. स. सदस्य श्री. दीपक लिमकर, श्री. संजय लिमकर, श्री. कुमार इंगळे, श्री. मुरलीधर माने, श्री. संजय ओंबासे, सदस्य श्री. विनोद डुबल, श्री. अमर शेडगे, सदस्य सौ. सारिका लिमकर, सौ. सुजाता उपरे, सौ. सोनल डुबल यांच्यासह स्थानिक ग्रामस्थ, कार्यकर्ते, युवकवर्ग व माता-भगिनी मोठ्या संख्येने उपस्थित होते. कार्यक्रमाचे सूत्रसंचालन व आभार प्रदर्शन मंडळाच्या पदाधिकाऱ्यांनी केले.

संपूर्ण कार्यक्रम उत्साहपूर्ण, आनंददायी व प्रेरणादायी वातावरणात संपन्न झाला.