📰 कराडात डॉ. बाबासाहेब आंबेडकर जयंतीनिमित्त आठवडाभर भव्य कार्यक्रमांची रेलचेल; ९ ते १५ एप्रिलदरम्यान विविध उपक्रम

कराड : विद्या मोरे 

कराड भारतरत्न डॉ.बाबासाहेब आंबेडकर जयंती उत्सव कमेटी, कराड (२०२६-२७) यांच्या वतीने दि. ९ ते १५ एप्रिलदरम्यान सामाजिक, सांस्कृतिक व आरोग्यविषयक विविध उपक्रमांचे भव्य आयोजन करण्यात आले आहे. आठवडाभर चालणाऱ्या या कार्यक्रमांमध्ये नागरिकांचा उत्स्फूर्त सहभाग अपेक्षित असल्याचे आयोजकांनी सांगितले.

दि. ९ एप्रिल रोजी स्वच्छ सर्वेक्षण अभियानांतर्गत नेत्र तपासणी व मोफत चष्मे वाटप सकाळी ८ ते दुपारी १२ या वेळेत होणार आहे. दि. १० एप्रिल रोजी भव्य रक्तदान शिबिराचे आयोजन करण्यात आले असून, ‘होम मिनिस्टर’ कार्यक्रमातील यांच्या उपस्थितीत सकाळी ११ ते सायं. ७.३० या वेळेत कार्यक्रम पार पडणार आहे.

दि. ११ एप्रिल रोजी भव्य मॅरेथॉन स्पर्धा, आरोग्य शिबीर तसेच अंधश्रद्धा निर्मूलन कार्यक्रम सकाळी ५ पासून सायंकाळपर्यंत विविध सत्रांमध्ये आयोजित करण्यात आले आहेत. दि. १२ एप्रिल रोजी प्रदीप बनसोडे यांचे व्याख्यान व भीमगीतांचा कार्यक्रम सायं. ७ ते ८ या वेळेत होणार आहे.

दि. १३ एप्रिल रोजी दांडपट्टा अभिवादन, भजन व मध्यरात्री विशेष कार्यक्रमांचे आयोजन करण्यात आले आहे. मुख्य दिन असलेल्या (दि. १४ एप्रिल) रोजी तेलचित्र प्रदर्शन, मानाचा घोडा लिलाव तसेच भव्य मिरवणूक सकाळपासून सायंकाळपर्यंत आयोजित करण्यात आली आहे.

उत्सवाच्या सांगता कार्यक्रमांतर्गत दि. १५ एप्रिल रोजी सायं. ७.३० वाजता भव्य डान्स शो होणार आहे.

सर्व कार्यक्रमांचे आयोजन भारतरत्न डॉ. बाबासाहेब आंबेडकर चौक, कराड येथे करण्यात आले असून, नागरिकांनी मोठ्या संख्येने उपस्थित राहून कार्यक्रमांना यशस्वी करावे, असे आवाहन उत्सव समितीचे अध्यक्ष राहुल भोसले व उपाध्यक्ष सुदेश थोरवडे यांनी केले आहे.