📰 अण्णासाहेब पाटील महामंडळाच्या कर्ज व व्याज परतावा लाभार्थ्यांच्या समस्यांकडे दुर्लक्ष; एकजुटीचे आवाहन

कराड : विद्या मोरे

 अण्णासाहेब पाटील आर्थिक मागास विकास महामंडळ यांच्या विविध कर्ज व व्याज परतावा योजनांचा लाभ घेणाऱ्या लाभार्थ्यांना सध्या अनेक अडचणींचा सामना करावा लागत असल्याचे समोर आले आहे. विशेषतः ऑक्टोबर २०२५ नंतर करण्यात आलेल्या बदलांमुळे ही परिस्थिती निर्माण झाल्याची माहिती पुढे आली आहे.

महामंडळाच्या व्यवस्थापकीय संचालकांनी संचालक मंडळाची बैठक न घेता योजनेत बदल केल्याचा आरोप करण्यात आला आहे. या बदलांमुळे पात्रता प्रमाणपत्र, उत्पन्न मर्यादा तसेच कर्ज प्रक्रियेत अडथळे निर्माण होऊन अनेक लाभार्थी अडचणीत सापडले आहेत. यासंदर्भात महामंडळाचे अध्यक्ष नरेंद्र अण्णासाहेब पाटील यांनी वारंवार पत्रव्यवहार करून प्रशासनाचे लक्ष वेधले आहे.

लाभार्थ्यांच्या समस्यांवर तोडगा काढण्यासाठी पुढील मागण्या ठळकपणे मांडण्यात आल्या आहेत :

▪️ ८ ऑक्टोबर २०२५ पूर्वी लागू असलेली नियमावली तात्काळ पुन्हा लागू करावी.

▪️ पात्रता प्रमाणपत्रासाठी लागू केलेली विशिष्ट उत्पन्न मर्यादा तात्काळ रद्द करावी.

▪️ वाहन कर्जासाठी अर्ज करणाऱ्या लाभार्थ्यांना योजनेचा लाभ द्यावा.

▪️ लाभार्थ्यांना व्याज परतावा वेळेत मिळण्यासाठी प्रभावी नियोजन करावे.

मात्र, अद्याप व्यवस्थापकीय संचालकांनी या मागण्यांवर ठोस निर्णय घेतलेला नसल्याची खंत व्यक्त करण्यात येत आहे. त्यामुळे या प्रश्नाची गांभीर्याने दखल घेऊन सर्व समन्वयक व लाभार्थ्यांनी एकजूट दाखवत आपल्या हक्कासाठी पुढे यावे, असे आवाहन करण्यात आले आहे.