📰 कराडमध्ये ‘रेट्रो क्वीन्स’चा सामाजिक उपक्रम; गरजू खेळाडू मुलीला मदतीचा हात

कराड विद्या मोरे

कराड : कराड येथील सौ. गौरी निलाखे यांनी त्यांच्या सामाजिक जाणिवेतून पुन्हा एकदा प्रेरणादायी उपक्रम राबवत गरजू खेळाडू मुलीला मदतीचा हात दिला. ॲथलिट अकादमीचे चिंचकर सर यांच्याशी संवाद साधून त्यांच्या “रेट्रो क्वीन्स” ग्रुपमार्फत एका होतकरू मुलीला स्पोर्ट शूज भेट देण्यात आले.

महिला दिनानिमित्त आयोजित करण्यात आलेल्या डान्स स्पर्धेत “रेट्रो क्वीन्स” ग्रुपला प्रथम क्रमांकाचे १० हजार रुपयांचे पारितोषिक मिळाले होते. या बक्षिसाची रक्कम स्वतःवर खर्च न करता, सामाजिक बांधिलकी जपत गरजू खेळाडू मुलीच्या गरजेसाठी वापरण्याचा निर्णय ग्रुपने घेतला. या माध्यमातून त्यांनी समाजाप्रती असलेली आपली जबाबदारी अधोरेखित केली.

नुक्कड कॅफे, पार्टी प्लेस येथे “चैत्र गौर” सणाचे आगळ्या-वेगळ्या पद्धतीने सेलिब्रेशन करण्यात आले. यावेळी ग्रुपने आनंद साजरा करतानाच सामाजिक कार्यालाही प्राधान्य देत एका होतकरू मुलीचा सन्मान केला. चिनू कांबळे या ॲथलेटिक्स क्षेत्रात प्रगती करणाऱ्या मुलीला स्पोर्ट शूजची गरज होती, ती “रेट्रो क्वीन्स” ग्रुपने पूर्ण केली.

सौ. गौरी निलाखे यांनी स्थापन केलेल्या “आम्ही खेळाडू” ग्रुपच्या माध्यमातूनही विविध उपक्रम राबवले जात आहेत. यामध्ये “राम जन्मभूमी ध्वजारोहण जल्लोष नृत्य”, “वीर सावरकर पुण्यतिथी निमित्त गीत”, “गजगे खेळ” अशा अनेक सांस्कृतिक व सामाजिक कार्यक्रमांचा समावेश आहे.

पाच महिन्यांपूर्वी गौरी निलाखे यांच्या संकल्पनेतून “रेट्रो क्वीन्स” या नवीन ग्रुपची स्थापना करण्यात आली. या ग्रुपने सादर केलेल्या “रेट्रो डान्स”चे दिग्दर्शन मीनल धापरे यांनी केले होते. या डान्सला मिळालेल्या यशानंतर त्याचे सेलिब्रेशनही सामाजिक उपक्रमाशी जोडण्यात आले.

या उपक्रमामुळे “रेट्रो क्वीन्स” ग्रुपची एक वेगळी ओळख निर्माण झाली असून, समाजातील गरजू घटकांसाठी काम करण्याचा आदर्श त्यांनी निर्माण केला आहे. स्वतःच्या आनंदात इतरांना सहभागी करून त्यांच्या चेहऱ्यावर हास्य फुलवण्याचा प्रयत्न या ग्रुपने यशस्वीपणे केला.

या उपक्रमासाठी ग्रुपमधील राजश्री शेंडे, मीनल धापरे, विद्या मोरे, सुप्रिया देशपांडे, चैत्राली शाळिग्राम, मीनल बेलापूरे, मानसी गरुड, विशाखा कित्तूर, सीमा कुलकर्णी यांनी विशेष सहकार्य केले. तसेच ग्रुपमधील सर्व सदस्यांना सौ. गौरी निलाखे यांच्या हस्ते बक्षिसांचे वितरण करण्यात आले.

या उपक्रमाबद्दल सौ. गौरी निलाखे व “रेट्रो क्वीन्स” ग्रुपचे सर्व स्तरांतून विशेष कौतुक होत आहे.