📰 महात्मा फुले उत्सव समितीच्या माध्यमातून काँग्रेसची राज्यभर संघटन बळकटी; पुण्यात नियोजन बैठकीत व्यापक कार्यक्रमांची घोषणा

कराड : विद्या मोरे : देशभरात काँग्रेस पक्ष बळकट करण्याच्या दृष्टीने Akhil Bharatiya Congress Committee कडून विविध नवीन समित्यांची स्थापना केली जात आहे. त्याचाच भाग म्हणून महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी ‘महात्मा ज्योतिबा फुले उत्सव समिती’ची स्थापना केली आहे. या समितीच्या प्रदेशाध्यक्षपदी सरचिटणीस भानुदास माळी यांची नियुक्ती करण्यात आली आहे.

या समितीच्या माध्यमातून महात्मा ज्योतिबा फुले, राजर्षी शाहू महाराज आणि डॉ. बाबासाहेब आंबेडकर यांच्या विचारांचा प्रसार जनतेपर्यंत करण्याचा संकल्प करण्यात आला आहे. याची सुरुवात ११ एप्रिल रोजी पुणे येथे महात्मा फुले जयंतीनिमित्त आयोजित नियोजन बैठकीने झाली.

ही बैठक हर्षवर्धन सपकाळ यांच्या अध्यक्षतेखाली पार पडली. यावेळी त्यांनी उत्सव समितीच्या माध्यमातून राज्यभर जिथे कार्यक्रम आयोजित केले जातील, तिथे स्वतः उपस्थित राहण्याचे आश्वासन देत समितीला पूर्ण पाठिंबा दर्शविला.

समितीचे अध्यक्ष भानुदास माळी यांनी आपल्या भाषणात वर्षभर विविध उपक्रम राबवून सामाजिक परिवर्तनाच्या विचारांचा प्रसार करण्यावर भर दिला. तसेच काँग्रेस पक्षाचे ध्येय, धोरणे आणि उद्दिष्टे जनतेपर्यंत पोहोचवून संघटन मजबूत करण्याचे कामही या समितीमार्फत केले जाईल, असे त्यांनी स्पष्ट केले.

याचबरोबर ११ एप्रिल २०२७ रोजी सातारा जिल्ह्यातील कडगून येथे या उपक्रमांचा भव्य समारोप करण्यात येणार असून, त्यावेळी राहुल गांधी, अशोक गेहलोत यांच्यासह काँग्रेसचे वरिष्ठ व ओबीसी नेते उपस्थित राहणार असल्याची माहिती देण्यात आली.

या बैठकीला माजी मंत्री रमेश बागवे, माजी आमदार दीप्तीताई चौधरी, तसेच अरविंद शिंदे, साहिल केदारी, प्रशांत जगताप, दरेकर, विमलताई कटरे, जे. पी. पाटील, प्रवीण जांबळे, राजीव घुटे, कांचन चाटे, अशोक खलाणे, तुषार पेंढारकर, सोमनाथ शेळके, विश्वपंथ नेवाळे, भरत वालेकर, संभाजी जाधव, आढाव, डॉ. मेघनाताई वैरागडे, ज्योतीताई परदेशी, गणेश राऊत, सुनील पंडित, धनराज राठोड, शंभो म्हात्रे, शैलेश राऊत, बाळाराम वसकर, प्रवीण आचरेकर, विश्वनाथ जगताप, मोहन अडसूळ, रोहित बनकर व त्यांच्या सहकाऱ्यांची उपस्थिती लक्षणीय होती.

यावेळी महात्मा फुले जयंतीनिमित्त १० हजार किलो मिसळ-पाव वाटप उपक्रम राबविण्यात आला. या उपक्रमासाठी बाळासाहेब अमराळे यांचा हर्षवर्धन सपकाळ व भानुदास माळी यांच्या हस्ते सत्कार करण्यात आला. तसेच बारामती परिसरातील इतर पक्षांच्या कार्यकर्त्यांनी काँग्रेसमध्ये प्रवेश करून पक्षबांधणीला बळ दिले.

कार्यक्रमाचे आयोजन प्रदीप परदेशी, कुमार राठोड, जीवन चाकणकर, बाळासाहेब विभुते, प्रणव परदेशी व सर्व सहकाऱ्यांनी काँग्रेस भवन येथे उत्कृष्टरीत्या केले.