“भाजपमध्ये संघटनाच सर्वोच्च; पक्षनिष्ठा आणि कार्यकर्त्यांची ताकद हीच खरी ओळख” – अॅड. भरतजी पाटील
पिंपरी-चिंचवड : “भारतीय जनता पक्ष हा कार्यकर्त्यांच्या बळावर उभा राहिलेला पक्ष आहे. येथे व्यक्तीपेक्षा विचार आणि संघटना मोठी मानली जाते. राजकारणात काम करताना वैयक्तिक महत्त्वाकांक्षेपेक्षा पक्षनिष्ठा आणि संघटनशक्ती यांना प्राधान्य दिले पाहिजे. भाजपमध्ये संघटनेपेक्षा कोणीही श्रेष्ठ नाही,” असे ठाम प्रतिपादन भाजपचे नवनियुक्त शहर प्रभारी अॅड. श्री भरतजी पाटील यांनी केले.
मोरवाडी येथील भाजपच्या शहर मध्यवर्ती कार्यालयात आयोजित करण्यात आलेल्या संघटनात्मक आढावा बैठकीत ते बोलत होते. आगामी पदवीधर व शिक्षक मतदारसंघ निवडणुकांच्या पार्श्वभूमीवर शहरातील पक्ष संघटना अधिक सक्षम आणि गतिमान करण्यासाठी ही बैठक अत्यंत महत्त्वपूर्ण मानली जात आहे. प्रदेशाध्यक्ष रविंद्र चव्हाण यांनी शहर प्रभारी म्हणून नियुक्ती केल्यानंतर अॅड. भरतजी पाटील यांनी प्रथमच शहरातील संघटनात्मक कामकाजाचा व्यापक आढावा घेत कार्यकर्त्यांशी थेट संवाद साधला.
बैठकीला शहराध्यक्ष शत्रुघ्न काटे, आमदार महेश लांडगे, आमदार अमित गोरखे, माजी आमदार अश्विनी जगताप, संघटन सरचिटणीस अॅड. मोरेश्वर शेडगे, प्राधिकरणाचे माजी अध्यक्ष सदाशिव खाडे, सरचिटणीस विकास डोळस, मधुकर बच्चे, युवा मोर्चाचे माजी प्रदेशाध्यक्ष अनुप मोरे, राजेश पिल्ले, राजू दुर्गे, दिनेश यादव यांच्यासह शहर व जिल्ह्यातील सर्व प्रमुख पदाधिकारी, विविध मोर्चांचे पदाधिकारी, आघाडी, सेल, प्रकोष्ठ प्रमुख तसेच मंडल अध्यक्ष व सरचिटणीस मोठ्या संख्येने उपस्थित होते.
बैठकीदरम्यान अॅड. भरतजी पाटील यांनी शहरातील प्रत्येक मंडल, बूथ आणि प्रभागनिहाय संघटनात्मक स्थितीचा सविस्तर आढावा घेतला. कार्यकर्त्यांची उपस्थिती, जनसंपर्क मोहिमा, बूथ बांधणी, नवीन सदस्य नोंदणी, विविध सामाजिक उपक्रम आणि आगामी निवडणुकांसाठीची रणनीती याबाबत चर्चा करण्यात आली. त्यांनी प्रत्येक पदाधिकाऱ्याला अधिक जबाबदारीने काम करण्याच्या सूचना दिल्या.
“भाजपचा प्रत्येक कार्यकर्ता हा पक्षाचा खरा चेहरा आहे. जनतेच्या प्रश्नांशी जोडले गेले नाही तर संघटना मजबूत होत नाही. प्रत्येक बूथ मजबूत झाला तर निवडणुकीत विजय निश्चित असतो. त्यामुळे आता केवळ बैठका घेऊन चालणार नाही, तर तळागाळात जाऊन लोकांमध्ये विश्वास निर्माण करणे आवश्यक आहे,” असे अॅड. पाटील यांनी सांगितले.
त्यांनी पुढे कार्यकर्त्यांना संघटनात्मक शिस्त, पक्षाची विचारधारा आणि सामाजिक बांधिलकी यांचे महत्त्व पटवून देत आगामी निवडणुकांसाठी आत्तापासूनच नियोजनबद्ध पद्धतीने काम सुरू करण्याचे आवाहन केले. “भाजप हा निवडणुकीपुरता पक्ष नसून समाजातील प्रत्येक घटकाशी जोडलेला जनआंदोलनाचा पक्ष आहे. त्यामुळे प्रत्येक पदाधिकाऱ्याने जनतेच्या सुख-दुःखात सहभागी होऊन विश्वासार्हता निर्माण करावी,” असेही ते म्हणाले.
यावेळी शहराध्यक्ष शत्रुघ्न काटे यांनीही कार्यकर्त्यांना मार्गदर्शन करताना पक्षाच्या जनाधारावर विश्वास व्यक्त केला. “पिंपरी-चिंचवड शहरात भारतीय जनता पक्षाच्या माध्यमातून आम्ही जनसेवेचे व्रत घेतले आहे. शहरातील प्रलंबित प्रश्न सोडवणे, नागरिकांच्या अडचणी प्रशासनापर्यंत पोहोचवणे आणि सामान्य कार्यकर्त्याला ताकद देत पक्ष संघटना अधिक मजबूत करणे, यासाठी आम्ही कटिबद्ध आहोत,” असे त्यांनी स्पष्ट केले.
“भाजपची खरी ताकद ही कार्यकर्त्यांच्या निष्ठेत आणि जनतेच्या विश्वासात आहे. आगामी काळात प्रत्येक विभागात अधिक आक्रमकपणे संघटन विस्तार केला जाईल. युवा कार्यकर्त्यांना संधी देऊन नवीन नेतृत्व तयार करण्यावरही भर दिला जाणार आहे,” असेही काटे यांनी सांगितले.
आमदार अमित गोरखे यांनी कार्यकर्त्यांना आगामी निवडणुकांच्या पार्श्वभूमीवर एकजुटीने काम करण्याचे आवाहन केले. “पक्ष संघटना मजबूत असेल तर कोणतीही निवडणूक अवघड नसते. त्यामुळे प्रत्येक कार्यकर्त्याने स्वतःची जबाबदारी ओळखून जनतेशी सातत्याने संपर्क ठेवला पाहिजे,” असे ते म्हणाले.
बैठकीत विविध पदाधिकाऱ्यांनीही शहरातील संघटनात्मक परिस्थिती, स्थानिक प्रश्न, आगामी निवडणुकांचे नियोजन आणि पक्ष विस्तारासंदर्भातील सूचना मांडल्या. अनेक कार्यकर्त्यांनी बूथस्तरावर संघटना अधिक सक्षम करण्यासाठी स्वतंत्र कृती आराखडा तयार करण्याची गरज व्यक्त केली.
मोरवाडी येथील भाजपच्या शहर मध्यवर्ती कार्यालयात पार पडलेल्या या बैठकीमुळे शहर भाजपमध्ये नवचैतन्य निर्माण झाले असून आगामी पदवीधर व शिक्षक मतदारसंघ निवडणुकांच्या तयारीला आता स्पष्टपणे वेग आल्याचे चित्र दिसून येत आहे. कार्यकर्त्यांमध्ये नवउत्साह निर्माण झाल्याने आगामी काळात शहरात भाजपची संघटनात्मक ताकद आणखी वाढणार असल्याची चर्चा राजकीय वर्तुळात सुरू झाली आहे.
Comments
Post a Comment