कृष्णा कारखान्याच्या निवडणुकीत सत्ताधाऱ्यांची आघाडी ? विरोधकांची मोर्चेबांधणी अद्याप विस्कळीत; रयत पॅनेलच्या भूमिकेवरच ठरणार अंतिम समीकरण सहकार विरुद्ध संस्थापक संघर्ष पुन्हा रंगणार; कृष्णाकाठच्या राजकारणात हालचालींना वेग

कराड : विद्या मोरे 

रेठरे बुद्रुक येथील यशवंतराव मोहिते कृष्णा सहकारी साखर कारखान्याच्या पंचवार्षिक निवडणुकीची रणधुमाळी सुरू होताच कृष्णाकाठच्या राजकारणात नव्या समीकरणांची जोरदार चर्चा सुरू झाली आहे. सत्ताधारी सहकार पॅनेलने संघटनात्मक ताकद, सभासदांशी असलेला संपर्क आणि संभाव्य राजकीय पाठिंब्याच्या बळावर आघाडी घेतल्याचे चित्र दिसत आहे. तर दुसरीकडे विरोधी संस्थापक पॅनेल अद्याप सक्षम उमेदवार, स्थानिक गटबांधणी आणि ठोस रणनीती यामध्ये मागे पडत असल्याची चर्चा राजकीय वर्तुळात रंगू लागली आहे.

विशेष म्हणजे, डॉ. इंद्रजीत मोहिते यांच्या रयत पॅनेलची अधिकृत भूमिका अद्याप स्पष्ट झालेली नसल्याने निवडणुकीतील उत्सुकता आणखी वाढली आहे. रयत पॅनेल स्वतंत्र लढणार की सत्ताधाऱ्यांना पाठिंबा देणार, यावरच निवडणुकीचे अंतिम गणित अवलंबून राहणार असल्याचे जाणकारांचे मत आहे.

कृष्णा कारखान्याची निवडणूक ही केवळ सहकार क्षेत्रापुरती मर्यादित राहत नाही, तर सातारा जिल्ह्यातील राजकीय शक्तिप्रदर्शन म्हणूनही तिच्याकडे पाहिले जाते. त्यामुळे आगामी जिल्हा परिषद, पंचायत समिती आणि विधानसभा निवडणुकांच्या दृष्टीनेही ही निवडणूक महत्त्वाची मानली जात आहे. कराड, वाळवा, पलूस आणि कडेगाव या चार तालुक्यांमध्ये प्रभाव असलेल्या या कारखान्याचे ५० हजारांहून अधिक सभासद असल्याने संपूर्ण जिल्ह्याचे लक्ष या निवडणुकीकडे लागले आहे.

निवडणूक कार्यक्रम जाहीर होताच सर्वच गटांनी गावागावांत बैठका, इच्छुकांची चाचपणी, सभासदांच्या भेटीगाठी आणि कार्यकर्त्यांच्या संपर्क मोहिमा सुरू केल्या आहेत. साखर कारखान्याच्या निवडणुकीला ग्रामीण भागात विशेष महत्त्व असल्याने शेतकरी सभासदांमध्येही मोठ्या प्रमाणावर चर्चा रंगू लागली आहे.

सत्ताधाऱ्यांचे पारडे का जड मानले जात आहे?

सध्याच्या घडीला विद्यमान सत्ताधारी सहकार पॅनेल तुलनेने मजबूत स्थितीत असल्याचे चित्र आहे. विद्यमान चेअरमन डॉ. सुरेश भोसले यांच्या नेतृत्वाखाली कारखान्याची सत्ता स्थिर राहिली असून, गत निवडणुकीतील एकहाती विजयामुळे कार्यकर्त्यांमध्ये आत्मविश्वास आहे.

याशिवाय कारखान्याचे माजी चेअरमन डॉ. इंद्रजीत मोहिते यांच्या रयत पॅनेलने यंदा स्वतंत्र लढत न देता सहकार पॅनेलला पाठिंबा देण्याच्या तयारीत असल्याची चर्चा राजकीय वर्तुळात सुरू आहे. जर ही चर्चा खरी ठरली, तर सत्ताधाऱ्यांची ताकद आणखी वाढण्याची शक्यता व्यक्त होत आहे.

तसेच खासदार नितीन काका पाटील आणि नामदार मकरंद आबा पाटील यांच्या मध्यस्थीनंतर उदयसिंह पाटील-उंडाळकर हेही सत्ताधाऱ्यांच्या बाजूने झुकतील, अशी शक्यता वर्तवली जात आहे. त्यामुळे विरोधी संस्थापक पॅनेल काहीसे एकाकी पडल्याचे चित्र निर्माण होत आहे.

विरोधकांसमोर नेमकी अडचण काय?

संस्थापक पॅनेलने हालचाली सुरू केल्या असल्या तरी अनेक ठिकाणी अद्याप सक्षम उमेदवारांची जुळवाजुळव पूर्ण झालेली नाही. काही भागांत स्थानिक पातळीवरील मतभेद, इच्छुकांची संख्या आणि नेतृत्वाचा प्रश्न यामुळे विरोधी गटाची मोर्चेबांधणी संथ गतीने सुरू असल्याचे बोलले जात आहे.

गत निवडणुकीतही विरोधकांमधील मतविभाजन हेच सत्ताधाऱ्यांच्या विजयाचे प्रमुख कारण ठरले होते. संस्थापक आणि रयत पॅनेल स्वतंत्र लढल्याने विरोधी मतांची विभागणी झाली आणि त्याचा थेट फायदा सहकार पॅनेलला झाला होता. यंदा विरोधकांकडून तीच चूक टाळण्याचा प्रयत्न सुरू असला, तरी अद्याप स्पष्ट आघाडीचे चित्र दिसत नाही.

रयत पॅनेल ठरणार ‘किंगमेकर’?

कृष्णा कारखान्याच्या निवडणुकीत रयत पॅनेलची भूमिका नेहमीच निर्णायक राहिली आहे. यंदाही अंतिम क्षणी रयत पॅनेल कोणत्या बाजूने उभे राहते, यावर निवडणुकीचे संपूर्ण चित्र बदलू शकते.

जर रयत पॅनेलने सहकार पॅनेलला पाठिंबा दिला, तर सत्ताधाऱ्यांचा विजयाचा मार्ग आणखी सुकर होऊ शकतो. मात्र रयत पॅनेल स्वतंत्र लढल्यास किंवा विरोधकांसोबत आघाडी केल्यास निवडणूक अटीतटीची होण्याची शक्यता नाकारता येत नाही.

उमेदवारीवरून सत्ताधारी गटातही खलबते

सत्ताधारी गटातही उमेदवारीवरून अंतर्गत हालचालींना वेग आला आहे. काही विद्यमान संचालकांना पुन्हा संधी मिळणार की नव्या चेहऱ्यांना स्थान दिले जाणार, याबाबत कार्यकर्त्यांमध्ये उत्सुकता आहे.

अलीकडील कार्यक्रमांमध्ये नव्या कार्यकर्त्यांना संधी देण्याचे संकेत देण्यात आल्याने अनेक इच्छुक सक्रिय झाले आहेत. त्यामुळे काही ज्येष्ठ संचालकांमध्ये अस्वस्थता वाढल्याचे बोलले जात आहे.

बड्या नेत्यांच्या भूमिकेकडे जिल्ह्याचे लक्ष

कृष्णा कारखान्याची निवडणूक ही सातारा जिल्ह्यातील राजकीय समीकरणांशी थेट जोडली गेली असल्याने पृथ्वीराज चव्हाण, विश्वजीत कदम, जयंत पाटील, बाळासाहेब पाटील तसेच उदयसिंह पाटील-उंडाळकर यांच्या भूमिकेकडे राजकीय वर्तुळाचे विशेष लक्ष लागले आहे.

या नेत्यांची भूमिका, संभाव्य आघाड्या आणि शेवटच्या टप्प्यातील राजकीय हालचाली यावरच निवडणुकीची दिशा ठरणार असल्याचे मानले जात आहे.

मतदान आणि मतमोजणी

कृष्णा कारखान्याच्या निवडणुकीसाठी २१ जून रोजी मतदान होणार असून २३ जून रोजी मतमोजणी पार पडणार आहे. निवडणुकीची तारीख जवळ येत असल्याने आता सर्वच गटांनी प्रचार, बैठकांचे नियोजन आणि सभासद संपर्क मोहिमा अधिक तीव्र करण्यास सुरुवात केली आहे.