उपविभागीय पोलीस अधिकारी राजश्री पाटील यांच्या धाडसी कारवाईने कराडमध्ये गांजा रॅकेट उघड; महिलेसह दोघांकडून २ लाखांचा गांजा जप्त

कराड : विद्या मोरे

मध्यवस्तीत पोलिसांची धडक कारवाई

कराड शहरातील शिवाजी स्टेडियम झोपडपट्टी परिसरात सुरू असलेल्या कथित गांजा विक्रीच्या रॅकेटवर पोलिसांनी मोठा घाव घातला. उपविभागीय पोलीस अधिकारी यांच्या मार्गदर्शनाखाली विशेष पथकाने धाड टाकत मोठ्या प्रमाणावर गांजा जप्त केला.

गुप्त माहितीवरून टाकला छापा

शिवाजी स्टेडियम परिसरात गांजाची विक्री सुरू असल्याची माहिती पोलिसांना गुप्त खबऱ्यामार्फत मिळाली होती. माहितीची खातरजमा झाल्यानंतर तातडीने विशेष पथक तयार करण्यात आले. त्यानंतर कराड शहर पोलीस आणि विशेष पथकाने संयुक्त कारवाई करत संबंधित घरावर छापा टाकला.

८ किलो गांजा जप्त

छाप्यादरम्यान पोलिसांनी घराची झडती घेतली असता लपवून ठेवलेला गांजाचा मोठा साठा उघडकीस आला. या कारवाईत तब्बल ८ किलो गांजा जप्त करण्यात आला असून, त्याची बाजारमूल्य सुमारे २ लाख रुपये असल्याचे पोलिसांनी सांगितले. या कारवाईमुळे परिसरात मोठी खळबळ उडाली.

महिलेसह दोघांना अटक

या प्रकरणी परवीन इब्राहिम पटेल (रा. इदगाह मैदान रोड, शिवाजी स्टेडियम झोपडपट्टी, कराड) आणि संदीप सतीश पाटील (रा. सुपने, ता. कराड) यांना पोलिसांनी अटक केली आहे. दोघांविरोधात कराड शहर पोलीस ठाण्यात अंमली पदार्थ विरोधी कायद्यान्वये गुन्हा दाखल करण्यात आला आहे.

तपासाची व्याप्ती वाढणार

या प्रकरणी पोलीस हवालदार सागर बर्गे यांनी फिर्याद दिली असून, गुन्हे प्रकटीकरण शाखेचे उपनिरीक्षक निखिल मगदूम पुढील तपास करत आहेत. गांजाचा साठा नेमका कुठून आणला गेला, त्याची विक्री कोणाला केली जात होती आणि या रॅकेटमध्ये आणखी कोणाचा सहभाग आहे का, याचा तपास आता सुरू करण्यात आला आहे.

अंमली पदार्थविरोधी मोहिमेला वेग

सातारा जिल्ह्यात वाढत्या अंमली पदार्थ तस्करीच्या पार्श्वभूमीवर पोलीस अधीक्षक आणि अपर पोलीस अधीक्षक यांच्या मार्गदर्शनाखाली विशेष मोहीम राबविण्यात येत आहे. त्याच मोहिमेअंतर्गत ही कारवाई करण्यात आली.

कारवाईत सहभागी अधिकारी

या धडक कारवाईत सहाय्यक पोलीस निरीक्षक निलेश तारू, पोलीस हवालदार असिफ जमादार, प्रविण पवार, सागर बर्गे, दीपक कोळी, स्वप्नील साबळे, मयूर देशमुख, मारुती लाटणे तसेच महिला पोलीस कॉन्स्टेबल सरीता मोहिते यांनी सहभाग घेतला.