दुधडेवाडीत पाण्यासाठी वणवण; महिलांची दररोज किलो मीटरची पायपीट

कराड : प्रतिनिधी

कराड तालुक्यातील दक्षिण भागातील दुधडेवाडी येथे पिण्याच्या पाण्याचा प्रश्न दिवसेंदिवस गंभीर बनत चालला आहे. गावातील पाण्याचे स्रोत आटल्याने नागरिकांना पाण्यासाठी भटकंती करावी लागत असून महिला, वृद्ध आणि लहान मुलांचे हाल होत आहेत. हंडाभर पाण्यासाठी नागरिकांना एक ते दीड किलोमीटर अंतर पार करावे लागत असल्याचे वास्तव समोर आले आहे.

उन्हाळा वाढताच पाणीटंचाईचे संकट

दुधडेवाडीसह घराळवाडी आणि काटेकरवाडी परिसरात प्रत्येक उन्हाळ्यात पाणीटंचाईचा प्रश्न ऐरणीवर येतो. कायमस्वरूपी जलयोजना अद्याप कार्यान्वित न झाल्याने ग्रामस्थांना बोअरवेल आणि विहिरींवरच अवलंबून राहावे लागत आहे. मात्र यंदा उपलब्ध पाणीसाठाही कमी झाल्याने परिस्थिती अधिकच बिकट झाली आहे.

महिलांवर पाण्याच्या संकटाचा सर्वाधिक परिणाम

गावातील महिलांना सकाळपासूनच पाण्यासाठी रांगा लावाव्या लागत आहेत. अनेक वेळा पाणी मिळेल की नाही, याचीही शाश्वती नसल्याने नागरिक त्रस्त झाले आहेत. उन्हाच्या कडाक्यात डोक्यावर हंडे घेऊन महिलांना लांब अंतर चालावे लागत असल्याचे चित्र गावात पाहायला मिळत आहे.

प्रशासनाच्या आश्वासनांवर ग्रामस्थ नाराज

ग्रामपंचायतीकडून पाणीपुरवठा योजनेसाठी प्रयत्न सुरू असल्याचे सांगितले जात असले, तरी प्रत्यक्षात कोणतीही ठोस सुविधा उपलब्ध नसल्याची तक्रार ग्रामस्थांनी केली आहे. घराळवाडीत पाण्याचे एटीएम उभारण्यात आले असले, तरी त्याचा पुरेसा लाभ नागरिकांना होत नसल्याची भावना व्यक्त होत आहे.

बंद पडलेल्या बोअरवेलमुळे संकट अधिक गडद

गावातील पिण्याच्या पाण्यासाठी असलेली एकमेव खाजगी बोअरवेल बंद पडल्याने नागरिकांची मोठी अडचण झाली आहे. येवती धरणातून इतर वापरासाठी काही प्रमाणात पाणीपुरवठा होत असला, तरी पिण्याच्या पाण्याचा प्रश्न अद्याप कायम आहे. त्यामुळे प्रशासनाने तातडीने टँकर सुरू करून नागरिकांना दिलासा द्यावा, अशी मागणी जोर धरू लागली आहे.

━━━━━━━━━━━━━━━━━━

◼️ ग्रामस्थांची भावना

“बोअरवेल दुरुस्तीसाठी जागा ग्रामपंचायतीच्या नावावर असणे आवश्यक असल्याचे सांगितले जात आहे. मात्र तोपर्यंत गावकऱ्यांना पाण्यासाठी वणवण करावी लागत आहे. प्रशासनाने तातडीने टँकर सुरू करून नागरिकांची गैरसोय थांबवावी.”

━━━━━━━━━━━━━━━━━━