सातारा काँग्रेसला नवे नेतृत्व नामदेवराव पाटील (आप्पा) यांच्या खांद्यावर जिल्हाध्यक्षपदाची धुरापृथ्वीराज चव्हाण यांच्या हस्ते पदग्रहण; हजारो कार्यकर्त्यांच्या साक्षीने सोहळा उत्साहात संघटन बळकटी, नव्या कार्यकर्त्यांना संधी आणि जनतेच्या प्रश्नांवर लढा देण्याचा निर्धार

 

कराड : विद्या मोरे; सातारा जिल्हा काँग्रेस कमिटीच्या नवनियुक्त जिल्हाध्यक्षपदी नामदेवराव पाटील (आप्पा) यांनी माजी मुख्यमंत्री पृथ्वीराज चव्हाण (बाबा) यांच्या हस्ते पदभार स्वीकारला. हजारो काँग्रेस कार्यकर्त्यांच्या उत्स्फूर्त उपस्थितीत झालेल्या या पदग्रहण व सत्कार सोहळ्यात जिल्ह्यात काँग्रेस संघटना अधिक सक्षम करण्याचा आणि तळागाळातील कार्यकर्त्यांना बळ देण्याचा निर्धार व्यक्त करण्यात आला.

उत्साहात पार पडला पदग्रहण सोहळा

कार्यक्रमाला युवक काँग्रेसचे प्रदेशाध्यक्ष शिवराज मोरे, प्रदेश प्रवक्ते हनमंत पवार, काँग्रेसच्या ओबीसी विभागाचे राष्ट्रीय उपाध्यक्ष भानुदास माळी, महाराष्ट्र प्रदेश काँग्रेस कमिटीचे सरचिटणीस अजितराव पाटील व राजेंद्र शेलार, माजी जिल्हाध्यक्ष डॉ. सुरेश जाधव, रणजितसिंह देशमुख, महिला जिल्हाध्यक्षा सुषमा राजेघोरपडे, जिल्हा परिषद सदस्या सौ. सुनंदा पाटील यांच्यासह अनेक पदाधिकारी, माजी लोकप्रतिनिधी आणि जिल्ह्यातील सर्व तालुक्यांतील हजारो कार्यकर्ते उपस्थित होते. प्रास्ताविक अजितराव पाटील यांनी केले, तर सूत्रसंचालन धैर्यशील सुपले यांनी केले.

संघटना मजबूत करण्याचे आवाहन

माजी मुख्यमंत्री पृथ्वीराज चव्हाण यांनी आपल्या भाषणात काँग्रेस पक्ष हा संविधान, लोकशाही आणि सामाजिक न्यायाच्या मूल्यांचा रक्षक असल्याचे सांगितले. देशात महागाई, बेरोजगारी, शेतकरी प्रश्न, उद्योगधंद्यांवरील संकट आणि सामाजिक सलोखा यांसारखी गंभीर आव्हाने उभी असल्याचे त्यांनी नमूद केले. या पार्श्वभूमीवर प्रत्येक गावात काँग्रेसची संघटना अधिक मजबूत करण्यासाठी कार्यकर्त्यांनी एकजुटीने काम करावे, असे आवाहन त्यांनी केले. सातारा जिल्ह्याचा काँग्रेसचा समृद्ध वारसा नामदेवराव पाटील यांच्या नेतृत्वाखाली अधिक भक्कम होईल, असा विश्वासही त्यांनी व्यक्त केला.

सरकारच्या धोरणांवर टीका

प्रदेश प्रवक्ते हनमंत पवार यांनी राज्य व केंद्र सरकारच्या विविध धोरणांवर टीका करत महागाई, बेरोजगारी, महिलांवरील अत्याचार, शेतकरी प्रश्न आणि सीमासुरक्षेच्या मुद्द्यांवर सरकार अपयशी ठरल्याचा आरोप केला. जनतेच्या प्रश्नांवर काँग्रेस कार्यकर्त्यांनी अधिक आक्रमकपणे लढा उभारण्याची गरज असल्याचे त्यांनी सांगितले.

युवकांना पुढे आणण्यावर भर

युवक काँग्रेसचे प्रदेशाध्यक्ष शिवराज मोरे यांनी सातारा जिल्हा काँग्रेसचा ऐतिहासिक वारसा अधोरेखित करत नव्या पिढीला पक्षाशी जोडण्याचे आवाहन केले. जिल्ह्यातील अनेक नेत्यांची राजकीय जडणघडण काँग्रेसमधून झाल्याचे सांगत त्यांनी युवकांच्या सहभागातून संघटना अधिक सक्षम करण्याची गरज व्यक्त केली.

काँग्रेसची विचारधारा अधिक बळकट होणार

माजी जिल्हाध्यक्ष डॉ. सुरेश जाधव यांनी पृथ्वीराज चव्हाण यांच्या नेतृत्वाखाली साताऱ्यात काँग्रेसची विचारधारा अधिक मजबूत झाल्याचे सांगितले. बदलत्या राजकीय परिस्थितीत कार्यकर्त्यांनी पक्षाशी निष्ठा ठेवून जनतेच्या प्रश्नांसाठी काम करणे आवश्यक असल्याचे त्यांनी नमूद केले.

सत्कार आणि गौरव

कार्यक्रमात जिल्हा परिषद सदस्या सौ. सुनंदा पाटील यांचा विशेष सत्कार करण्यात आला. तसेच काँग्रेसच्या ओबीसी विभागाच्या राष्ट्रीय उपाध्यक्षपदी निवड झाल्याबद्दल भानुदास माळी यांचाही गौरव करण्यात आला. सत्काराला उत्तर देताना माळी यांनी सामान्य कार्यकर्त्यांना नेतृत्वाची संधी देण्याची परंपरा पृथ्वीराज चव्हाण यांनी कायम जपल्याचे सांगितले.

विश्वासाला तडा जाऊ देणार नाही

नवनिर्वाचित जिल्हाध्यक्ष नामदेवराव पाटील (आप्पा) यांनी पक्षाने सोपविलेली जबाबदारी प्रामाणिकपणे पार पाडण्याची ग्वाही दिली. प्रत्येक कार्यकर्त्याला सोबत घेऊन गावागावांत काँग्रेसची संघटना मजबूत करणे, नव्या कार्यकर्त्यांना संधी देणे आणि जनतेच्या प्रश्नांवर प्रभावीपणे आवाज उठविणे हेच आपले प्रमुख ध्येय राहील, असे त्यांनी स्पष्ट केले.

कार्यकर्त्यांच्या उत्साहाने वातावरण भारावले

महिला काँग्रेस, युवक काँग्रेस, एनएसयूआय, सेवा दल तसेच जिल्ह्यातील सर्व तालुक्यांतील पदाधिकारी आणि हजारो कार्यकर्त्यांच्या उपस्थितीमुळे संपूर्ण कार्यक्रमाला उत्सवी वातावरण लाभले. या सोहळ्याच्या माध्यमातून सातारा जिल्ह्यात काँग्रेस संघटना अधिक बळकट करण्याचा निर्धार व्यक्त करण्यात आला.