मा.श्रीनिवास पाटील यांच्या पाठपुराव्याला मा.नितीन गडकरी यांची साथ; कोल्हापूर नाका उड्डाणपूल अंतिम टप्प्यात वाहतूक कोंडीवर मिळणार मोठा दिलासा; कराडच्या विकासाला चालना देणारा महत्त्वाचा प्रकल्प लवकरच पूर्ण

  

कराड विद्या मोरे : राष्ट्रीय महामार्ग क्रमांक ४ (पुणे-कागल) वरील कराड येथील कोल्हापूर नाका परिसरात उभारण्यात येत असलेल्या सहापदरी उड्डाणपुलाचे काम अंतिम टप्प्यात पोहोचले आहे. पुलावरील एका बाजूची वाहतूक छोट्या वाहनांसाठी सुरू करण्यात आली असून उर्वरित कामही वेगाने सुरू आहे. या पार्श्वभूमीवर माजी खासदार श्रीनिवास पाटील यांनी केंद्रीय रस्ते वाहतूक व महामार्ग मंत्री नितीन गडकरी यांचे आभार व्यक्त केले आहेत.

• लोकसभेतील पाठपुराव्याला यश

माजी खासदार श्रीनिवास पाटील यांनी प्रसिद्धीस दिलेल्या निवेदनात म्हटले आहे की, १७ व्या लोकसभेत सातारा मतदारसंघाचे प्रतिनिधित्व करत असताना त्यांनी कराडच्या कोल्हापूर नाका परिसरातील वाढती वाहतूक कोंडी आणि नागरिकांना होत असलेल्या गैरसोयीचा प्रश्न लोकसभेत मांडला होता. यावेळी या ठिकाणी सहापदरी उड्डाणपूल उभारण्याची मागणी त्यांनी केंद्रीय मंत्री नितीन गडकरी यांच्याकडे केली होती. या मागणीची तत्काळ दखल घेत गडकरी यांनी संबंधित यंत्रणेला आवश्यक कार्यवाहीचे निर्देश दिले होते.

• कराडच्या वाहतुकीसाठी महत्त्वाचा प्रकल्प

कोल्हापूर नाका हा कराड शहरातील सर्वाधिक वर्दळीच्या चौकांपैकी एक आहे. राष्ट्रीय महामार्गावरील वाहतूक, शहरातील अंतर्गत वाहनांची ये-जा आणि औद्योगिक तसेच व्यापारी वाहतुकीमुळे येथे नेहमीच कोंडीची समस्या निर्माण होत होती. उड्डाणपूल पूर्ण झाल्यानंतर ही समस्या मोठ्या प्रमाणात कमी होणार असून वाहनधारकांचा वेळ आणि इंधनाची बचत होण्यास मदत होणार आहे.

• नागरिकांना मिळणार मोठा दिलासा

या उड्डाणपुलामुळे स्थानिक नागरिक, विद्यार्थी, शेतकरी, व्यापारी, उद्योजक तसेच राष्ट्रीय महामार्गावरून प्रवास करणाऱ्या लाखो प्रवाशांना मोठा दिलासा मिळणार आहे. वारंवार होणाऱ्या वाहतूक कोंडीमुळे निर्माण होणारा मनस्ताप, अपघातांचा धोका आणि वेळेचा अपव्यय कमी होऊन वाहतूक अधिक सुरक्षित आणि गतिमान होईल, अशी अपेक्षा व्यक्त केली जात आहे.

• नितीन गडकरी यांच्या कार्यपद्धतीचे कौतुक

या प्रकल्पाच्या उभारणीत केंद्रीय मंत्री नितीन गडकरी यांची संवेदनशीलता, विकासाभिमुख दृष्टीकोन आणि जलद निर्णयक्षमता महत्त्वाची ठरल्याचे श्रीनिवास पाटील यांनी नमूद केले. लोकप्रतिनिधींनी मांडलेल्या विकासकामांच्या मागण्यांना प्राधान्य देऊन त्या प्रत्यक्षात आणण्याची त्यांची कार्यशैली देशासाठी प्रेरणादायी असल्याचेही त्यांनी सांगितले.

• पायाभूत सुविधांच्या विकासाला नवा वेग

देशभरात रस्ते, महामार्ग, पूल, बोगदे आणि विविध पायाभूत सुविधा उभारण्यात नितीन गडकरी यांनी महत्त्वपूर्ण योगदान दिले आहे. त्यांच्या नेतृत्वाखाली देशातील रस्ते विकासाला नवी दिशा आणि नवा वेग मिळाला असून आधुनिक वाहतूक व्यवस्थेचा पाया अधिक मजबूत होत असल्याचे श्रीनिवास पाटील यांनी म्हटले आहे.

• सातारा जिल्ह्याविषयी विशेष आत्मीयता

कराड दौऱ्यादरम्यान नितीन गडकरी यांनी सातारा-शेंद्रे सहापदरी महामार्ग प्रकल्पाचे लोकार्पण केले होते. सातारा जिल्ह्याच्या विकासासाठी त्यांनी दाखविलेली आत्मीयता, तत्परता आणि सकारात्मक दृष्टिकोन येथील जनतेच्या कायम स्मरणात राहील, असे मत श्रीनिवास पाटील यांनी व्यक्त केले.

• जनतेच्या वतीने व्यक्त केले आभार

सातारा लोकसभा मतदारसंघातील नागरिकांच्या वतीने नितीन गडकरी यांचे मनःपूर्वक आभार व्यक्त करताना श्रीनिवास पाटील यांनी महाराष्ट्रासह देशभरातील विकासकामांना भविष्यातही अशीच गती मिळत राहावी, अशी अपेक्षा व्यक्त केली. कोल्हापूर नाका उड्डाणपूल पूर्ण झाल्यानंतर कराडच्या विकासाला नवी चालना मिळेल आणि शहराच्या वाहतूक व्यवस्थेत सकारात्मक बदल घडेल, असा विश्वासही त्यांनी व्यक्त केला.