रोटरी क्लब ऑफ कराडच्या अध्यक्षपदी रो. चंद्रशेखर पाटील; सेक्रेटरीपदी रो. सुनील चाळकेरोटरी वर्ष २०२६-२७ साठी नवी कार्यकारिणी जाहीर; सामाजिक, आरोग्य व पर्यावरण विषयक उपक्रमांना प्राधान्य

 

कराड, दि. ३० : विद्या मोरे ; समाजसेवा, आरोग्य, शिक्षण आणि पर्यावरण संवर्धनाच्या क्षेत्रात सातत्याने उल्लेखनीय कार्य करणाऱ्या रोटरी क्लब ऑफ कराडच्या रोटरी वर्ष २०२६-२७ साठी अध्यक्षपदी रो. चंद्रशेखर पाटील तर सेक्रेटरीपदी रो. सुनील चाळके यांची बिनविरोध निवड करण्यात आली आहे. नव्या कार्यकारिणीची घोषणा करण्यात आली असून, आगामी वर्षात अधिक व्यापक आणि परिणामकारक सामाजिक उपक्रम राबविण्याचा निर्धार नव्या पदाधिकाऱ्यांनी व्यक्त केला आहे.

नव्या कार्यकारिणीवर मोठी जबाबदारी

उपाध्यक्षपदी रामचंद्र लाखोले, खजिनदारपदी प्रबोध पुरोहित तर क्लब ट्रेनरपदी शशांक पालकर यांची नियुक्ती करण्यात आली आहे. तसेच गजानन कुसुरकर, राजगौंडा अपिने, रवींद्र देशमुख, प्रताप मोरे, राहुल कुलकर्णी, जगदीश वाघ, डॉ. राहुल फासे, चंद्रकुमार डांगे, आनंदा थोरात, अनघा बर्डे, डॉ. भाग्यश्री पाटील, शिवराज माने, राहुल पुरोहित, किरण जाधव, डॉ. शुभांगी पाटील, गजानन माने, डॉ. सविता मोहिते, डॉ. शेखर कोगनुलकर, डॉ. अस्मिता फासे, विनायक राऊत, बद्रीनाथ धस्के, अशोक इंगळे, सीमा धर्मजिज्ञासू, सूर्यकांत भोसले, अभय पवार, रघुनाथ डुबल, सुहास पवार, विनायक माळी, डॉ. श्रुती शहा आणि जयंत जगताप यांची संचालक मंडळावर नियुक्ती करण्यात आली आहे. विविध प्रकल्पांची जबाबदारी या पदाधिकाऱ्यांवर सोपविण्यात आली आहे.

डिस्ट्रिक्ट ३१३२चे नेतृत्व; ७० वर्षांची गौरवशाली वाटचाल

यंदा रो. जयेश पटेल यांच्या नेतृत्वाखाली रोटरी डिस्ट्रिक्ट ३१३२ मध्ये सामाजिक विकासाचे विविध प्रकल्प राबविले जाणार आहेत. या डिस्ट्रिक्टमध्ये ११ जिल्ह्यांतील सुमारे १०९ रोटरी क्लब कार्यरत आहेत. दरम्यान, रोटरी क्लब ऑफ कराड यंदा आपल्या स्थापनेचे ७० वे वर्ष साजरे करत असून, गेल्या सात दशकांत क्लबने आरोग्य, शिक्षण, पर्यावरण, युवक विकास आणि सामाजिक सेवेत मोलाचे योगदान दिले आहे.

आरोग्य, पर्यावरण व क्रीडा उपक्रमांना प्राधान्य

नूतन अध्यक्ष रो. चंद्रशेखर पाटील यांनी सांगितले की, यंदा ग्रामीण भागातील नागरिकांच्या आरोग्याला केंद्रस्थानी ठेवून ॲनिमिया फ्री इंडिया, कर्करोग जनजागृती अभियान, हँड्स फॉर ह्युमॅनिटी, अन्नछत्र योजनेंतर्गत द. शि. एरम मूकबधिर शाळेत पौष्टिक आहार वाटप, गर्भसंस्कार शिबिरे, नेत्र तपासणी शिबिरे, सीडबॉल निर्मिती, वृक्षारोपण, सुंदर हस्ताक्षर स्पर्धा, जलतरण आणि ॲथलेटिक्स स्पर्धांसह विविध उपक्रम राबविण्यात येणार आहेत.

रोटरीच्या सात फोकस एरियावर विशेष भर

सेक्रेटरी रो. सुनील चाळके यांनी सांगितले की, विद्यार्थी, दिव्यांग, महिला सक्षमीकरण आणि समाजहिताच्या विविध योजना राबविण्यात येणार आहेत. शांतता व संघर्ष प्रतिबंध, रोगप्रतिबंध व उपचार, पाणी व स्वच्छता, माता-बाल आरोग्य, मूलभूत शिक्षण व साक्षरता, आर्थिक व सामुदायिक विकास तसेच पर्यावरण संवर्धन या रोटरीच्या सात प्रमुख फोकस एरियावर विशेष भर देत समाजाच्या सर्व घटकांपर्यंत सेवाकार्य पोहोचविण्याचा प्रयत्न केला जाणार आहे.