उड्डाणपुलाच्या उद्घाटना वरून कराडकरांच्या मनातील प्रश्न; विकासकामांचे श्रेय सर्वांचे, मगकराड उद्घाटनाचे व्यासपीठ काही मोजक्यांचेच का?-विकास पाटील काले

  कराड : विद्या मोरे

कराडच्या बहुप्रतीक्षित उड्डाणपुलाचे उद्घाटन नुकतेच मोठ्या उत्साहात पार पडले. शहराच्या वाहतूक व्यवस्थेला दिलासा देणारा हा महत्त्वाकांक्षी प्रकल्प अखेर नागरिकांच्या सेवेत दाखल झाल्याने सर्व स्तरांतून समाधान व्यक्त होत आहे. मात्र, उद्घाटन सोहळ्यानंतर कराडकरांच्या मनात एक महत्त्वाचा प्रश्न निर्माण झाला असून त्यावर शहरात चर्चा सुरू आहे.

कराडच्या उड्डाणपुलासाठी पाठपुरावा करून मंजुरी आणण्यात माजी खासदार श्रीनिवास पाटील यांचे महत्त्वपूर्ण योगदान असल्याचे सर्वश्रुत आहे. या प्रकल्पासाठी त्यांनी केंद्र व राज्य शासन स्तरावर सातत्याने पाठपुरावा केला होता. विविध बैठका, मंत्रालयीन प्रयत्न आणि प्रशासकीय पातळीवरील समन्वयातून या प्रकल्पाला गती मिळाल्याचे अनेकदा सांगितले गेले आहे. त्यामुळे या पुलाचे उद्घाटन होत असताना त्यांची उपस्थिती अपेक्षित असल्याची भावना अनेक नागरिकांनी व्यक्त केली.

मात्र, उद्घाटन कार्यक्रमात प्रामुख्याने भाजपच्या नेत्यांची उपस्थिती दिसून आली. पूल महायुती सरकारच्या कार्यकाळात पूर्ण झाला, हे जरी वास्तव असले तरी या प्रकल्पासाठी प्रयत्न करणारे इतर लोकप्रतिनिधी, महायुतीतील घटक पक्षांचे प्रतिनिधी, माजी पदाधिकारी आणि संबंधित सर्वांना योग्य सन्मानाने निमंत्रित करणे अपेक्षित नव्हते का, असा प्रश्न नागरिकांकडून उपस्थित केला जात आहे.

विशेष म्हणजे, या पुलाच्या मंजुरीसाठी सातत्याने प्रयत्न करणारे माजी खासदार श्रीनिवास पाटील यांचे निवासस्थानही या परिसरात असताना त्यांना उद्घाटनासाठी निमंत्रित करण्यात आले नव्हते का, अशी चर्चा नागरिकांमध्ये रंगत आहे. विकासकामांच्या बाबतीत राजकीय मतभेद बाजूला ठेवून सर्व संबंधितांचा सन्मान राखणे ही लोकशाहीची परंपरा मानली जाते. मात्र, या कार्यक्रमात तसे झाले का, याबाबत प्रश्नचिन्ह उपस्थित केले जात आहे.

लोकशाहीमध्ये विकासकामांचे श्रेय कोणत्याही एका पक्षाचे किंवा व्यक्तीचे नसते. एखादा प्रकल्प मंजूर होण्यापासून ते पूर्णत्वास जाण्यापर्यंत अनेक लोकप्रतिनिधी, अधिकारी, अभियंते, कर्मचारी आणि नागरिकांचे योगदान असते. त्यामुळे अशा सार्वजनिक प्रकल्पांच्या उद्घाटनावेळी सर्व संबंधितांना समान सन्मान देणे हीच लोकशाहीची खरी परंपरा आणि संस्कृती ठरेल, असे मत अनेक कराडकर व्यक्त करत आहेत.

आज उड्डाणपूल नागरिकांच्या सेवेत दाखल झाला, याचा आनंद सर्वांनाच आहे. मात्र, या निमित्ताने कराडकरांच्या मनात पडलेला प्रश्नही तितकाच महत्त्वाचा आहे —

"विकासकामांचे श्रेय सर्वांचे, मग उद्घाटनाचे व्यासपीठ काही मोजक्यांचेच का?"

सार्वजनिक विकासकामे ही जनतेची असतात. त्यावर कोणत्याही एका पक्षाचा किंवा व्यक्तीचा अधिकार नसतो. त्यामुळे भविष्यात अशा प्रकल्पांच्या उद्घाटनावेळी योगदान देणाऱ्या सर्वांना समान सन्मान देण्यात यावा, हीच कराडकरांची अपेक्षा असल्याचे बोलले जात आहे.