कराड दक्षिणला जलसंधारणाची मोठी भेट! ५ सिमेंट काँक्रीट बंधाऱ्यांसाठी ₹२.१६ कोटींचा निधी मंजूर आ.डॉ. अतुलबाबा भोसले यांच्या सातत्यपूर्ण पाठपुराव्याला यश; जलयुक्त शिवार २.० अंतर्गत कामांना वेग

कराड | विद्या मोरे

कराड दक्षिण विधानसभा मतदारसंघातील कासारशिरंबे, साळशिरंबे आणि तुळसण या गावांमध्ये जलसंधारणाच्या दृष्टीने महत्त्वपूर्ण पाऊल उचलण्यात आले असून, जलयुक्त शिवार २.० अभियानांतर्गत ५ सिमेंट काँक्रीट बंधाऱ्यांसाठी तब्बल ₹२ कोटी १६ लाख ३८ हजारांचा निधी मंजूर करण्यात आला आहे. आमदार डॉ. अतुलबाबा भोसले यांच्या सातत्यपूर्ण पाठपुराव्यामुळे हा निधी मंजूर झाल्याने परिसरातील पाणीटंचाई कमी होण्यासह शेतीला मोठा दिलासा मिळणार आहे.

पाणीटंचाईवर कायमस्वरूपी उपाय

कराड दक्षिणमधील कासारशिरंबे, साळशिरंबे आणि तुळसण या गावांना दरवर्षी उन्हाळ्यात तीव्र पाणीटंचाईचा सामना करावा लागतो. अनेक वेळा ग्रामस्थांना पिण्याच्या पाण्यासाठी टँकरवर अवलंबून राहावे लागते, तर शेतकऱ्यांनाही सिंचनासाठी पाण्याअभावी मोठ्या अडचणींचा सामना करावा लागतो. त्यामुळे ग्रामस्थांनी या भागात सिमेंट काँक्रीट बंधारे उभारण्याची मागणी आमदार डॉ. अतुलबाबा भोसले यांच्याकडे केली होती.

पाठपुराव्याला मिळाले यश

ग्रामस्थांची अडचण लक्षात घेऊन आमदार डॉ. अतुलबाबा भोसले यांनी राज्य शासन आणि मृदा व जलसंधारण विभागाकडे सातत्याने पाठपुरावा केला. त्यांच्या प्रयत्नांची दखल घेत जलयुक्त शिवार २.० योजनेअंतर्गत पाच सिमेंट काँक्रीट बंधाऱ्यांच्या उभारणीसाठी निधी मंजूर करण्यात आला.

या बंधाऱ्यांसाठी मंजूर निधी

- कासारशिरंबे – बंधारा क्र. ७ : ₹४४.७९ लाख

- कासारशिरंबे – बंधारा क्र. ८ : ₹४४.५९ लाख

- साळशिरंबे – बंधारा क्र. १ : ₹४४.०८ लाख

- तुळसण – बंधारा क्र. १ : ₹४२.५६ लाख

- तुळसण – बंधारा क्र. २ : ₹४०.३६ लाख

एकूण मंजूर निधी : ₹२ कोटी १६ लाख ३८ हजार

शेतकऱ्यांसाठी ठरणार वरदान

या बंधाऱ्यांच्या उभारणीमुळे भूजल पुनर्भरणाला मोठी चालना मिळणार असून विहिरी, बोअरवेल आणि ओढ्यांतील पाण्याची पातळी वाढण्यास मदत होईल. परिणामी सिंचनक्षमता वाढून वर्षभर शेतीसाठी पाण्याची उपलब्धता सुधारेल. याचा थेट लाभ शेतकरी आणि ग्रामस्थांना होणार असून जलसुरक्षेच्या दृष्टीने हा महत्त्वाचा टप्पा मानला जात आहे.

ग्रामस्थांकडून समाधान व्यक्त

निधी मंजूर झाल्यानंतर कासारशिरंबे, साळशिरंबे आणि तुळसण परिसरातील ग्रामस्थांनी आमदार डॉ. अतुलबाबा भोसले यांच्या पाठपुराव्याचे कौतुक करत राज्यातील भाजपा-महायुती सरकारचे आभार व्यक्त केले.