'स्व. संपतराव पाटील तालुका लोकशाही दिन' : सर्वसामान्य नागरिकांच्या न्याय हक्कासाठी लढणारे प्रभावी लोकचळवळीचे व्यासपीठ

 

 *कराड, विद्या मोरे                                   शासनाच्या विविध विभागांकडे वारंवार पाठपुरावा करूनही अनेक नागरिकांचे प्रश्न वर्षानुवर्षे प्रलंबित राहतात. शासकीय कार्यालयांतील दिरंगाई, अधिकाऱ्यांची अनास्था, कागदोपत्री अडथळे आणि वेळेत निर्णय न झाल्यामुळे सर्वसामान्य नागरिकांना मोठ्या मानसिक, आर्थिक आणि सामाजिक त्रासाला सामोरे जावे लागते. अशा नागरिकांना न्याय मिळवून देण्यासाठी, त्यांच्या हक्काच्या मागण्यांना प्रशासनापर्यंत प्रभावीपणे पोहोचविण्यासाठी आणि शासनाला उत्तरदायी बनविण्याच्या उद्देशाने 'स्व. संपतराव पाटील तालुका लोकशाही दिन' हा उपक्रम कराड तालुक्यात सातत्याने राबविण्यात येत आहे.

स्वर्गीय संपतराव पाटील यांनी आयुष्यभर सर्वसामान्यांच्या प्रश्नांसाठी केलेल्या संघर्षाला अभिवादन म्हणून या उपक्रमाला त्यांचे नाव देण्यात आले आहे. लोकांच्या न्याय्य हक्कांसाठी सातत्याने लढा देण्याची त्यांची भूमिका आजही या उपक्रमातून जपली जात असून, नागरिकांना न्याय मिळवून देण्याचा निर्धार आयोजकांनी व्यक्त केला आहे.

या उपक्रमाअंतर्गत दर महिन्याच्या पहिल्या सोमवारी नागरिकांना आपल्या विविध तक्रारी, मागण्या आणि समस्या थेट प्रशासनासमोर मांडण्याची संधी दिली जाते. महसूल विभाग, ग्रामपंचायत, पंचायत समिती, सार्वजनिक बांधकाम विभाग, वीज वितरण, पाणीपुरवठा, आरोग्य, शिक्षण, समाजकल्याण, कृषी, पोलीस प्रशासन तसेच इतर शासकीय कार्यालयांशी संबंधित कोणतीही समस्या या लोकशाही दिनात मांडता येते.

अनेक नागरिकांनी वारंवार अर्ज करूनही त्यांची दखल घेतली जात नाही, तर काही प्रकरणांमध्ये अधिकारी आणि कर्मचारी कार्यालयात हेलपाटे मारायला लावतात. अशा परिस्थितीत संबंधित अधिकाऱ्यांना नागरिकांच्या प्रश्नांबाबत जाब विचारणे, तक्रारींचा पाठपुरावा करणे आणि निश्चित कालावधीत त्यांचे निराकरण करण्यासाठी प्रशासनावर लोकशाही मार्गाने दबाव निर्माण करणे, हे या उपक्रमाचे प्रमुख वैशिष्ट्य आहे.

लोकशाही दिनात नागरिकांनी आपल्या तक्रारींसोबत आवश्यक कागदपत्रे, अर्जांच्या प्रती, संबंधित पुरावे आणि आवश्यक माहिती सादर केल्यास त्याची नोंद करून संबंधित विभागाकडे पाठपुरावा केला जातो. अनेक प्रलंबित प्रश्नांना या व्यासपीठामुळे गती मिळाल्याचे नागरिकांनी अनुभवले असून, प्रशासनालाही उत्तरदायित्वाची जाणीव करून देण्यात हा उपक्रम महत्त्वाची भूमिका बजावत आहे.

शासनाच्या विविध कल्याणकारी योजना पात्र लाभार्थ्यांपर्यंत वेळेत पोहोचाव्यात, महसूल व ग्रामविकासाशी संबंधित प्रकरणे प्रलंबित राहू नयेत, पाणी, रस्ते, वीज, आरोग्य, शिक्षण, सामाजिक न्याय आणि इतर मूलभूत सुविधांबाबत नागरिकांना न्याय मिळावा, हा या उपक्रमामागील व्यापक उद्देश आहे. कोणत्याही राजकीय किंवा वैयक्तिक स्वार्थापेक्षा सर्वसामान्य नागरिकांच्या न्याय्य हक्कांना प्राधान्य देण्याची भूमिका या लोकशाही दिनातून सातत्याने मांडली जाते.

कराड तालुक्यातील नागरिकांनी आपल्या न्याय्य मागण्या आणि तक्रारींसह मोठ्या संख्येने सहभागी व्हावे, प्रशासनासमोर निर्भीडपणे आपली बाजू मांडावी आणि लोकशाही प्रक्रियेला अधिक बळ द्यावे, असे आवाहन आयोजकांच्या वतीने करण्यात आले आहे.

या उपक्रमासंदर्भातील अधिक माहितीसाठी अथवा तक्रार नोंदविण्यासाठी सचिन पाटील यांच्याशी ९८९०४२०५२७ या क्रमांकावर संपर्क साधावा, असेही आवाहन करण्यात आले आहे.