सारथी, अण्णासाहेब पाटील महामंडळ व डॉ. पंजाबराव देशमुख योजनांतील त्रुटी दूर करा; मराठा महासंघाचे राधाकृष्ण विखे पाटील यांना निवेदन विद्यार्थी व युवकांच्या प्रश्नांसाठी निवेदन
कराड : विद्या मोरे ;अखिल भारतीय मराठा महासंघाच्या वतीने महाराष्ट्राचे जलसंपदा मंत्री तथा मराठा आरक्षण उपसमितीचे अध्यक्ष मा. ना. राधाकृष्ण विखे पाटील यांना डॉ. पंजाबराव देशमुख वसतीगृह निर्वाह भत्ता योजना, सारथी संस्था तसेच अण्णासाहेब पाटील आर्थिक मागास विकास महामंडळाच्या विविध योजनांतील त्रुटी दूर करून विद्यार्थी व युवकांना न्याय मिळावा, या मागणीचे सविस्तर निवेदन सादर करण्यात आले.
अण्णासाहेब पाटील महामंडळाबाबत प्रमुख मागण्या
निवेदनात लाभार्थ्यांचा अनेक महिन्यांपासून प्रलंबित असलेला व्याज परतावा तातडीने वितरित करावा, किरकोळ व तांत्रिक कारणांवर अर्ज नाकारण्याची पद्धत बंद करावी, कर्ज मंजुरी, एलओआय (LOI), अनुदान व इतर प्रस्तावांच्या मंजुरीतील विलंब दूर करावा, पोर्टलमधील तांत्रिक त्रुटी दूर करून पारदर्शक व वेळबद्ध कार्यपद्धती लागू करावी तसेच प्रलंबित अर्जांचा विशेष अभियान राबवून तातडीने निपटारा करावा, अशा प्रमुख मागण्या करण्यात आल्या.
निर्वाह भत्ता योजनेतील अडचणी दूर करण्याची मागणी
डॉ. पंजाबराव देशमुख वसतीगृह निर्वाह भत्ता योजनेअंतर्गत विद्यार्थ्यांना निर्वाह भत्ता वेळेवर वितरित करावा, प्रलंबित अर्ज व थकीत रक्कम तात्काळ अदा करावी, कागदपत्रांच्या पडताळणीतील अनावश्यक विलंब थांबवून प्रक्रिया सुलभ करावी आणि आर्थिकदृष्ट्या दुर्बल विद्यार्थ्यांना कोणत्याही प्रशासकीय कारणामुळे लाभापासून वंचित ठेवू नये, अशी मागणी करण्यात आली.
विखे पाटील यांचा सकारात्मक प्रतिसाद
मा. ना. राधाकृष्ण विखे पाटील यांनी निवेदनाची गांभीर्याने दखल घेत सकारात्मक प्रतिसाद दिला. अण्णासाहेब पाटील आर्थिक मागास विकास महामंडळाच्या लाभार्थ्यांचा प्रलंबित व्याज परतावा सुरळीतपणे वितरित करण्यासाठी शासनस्तरावर प्रयत्न सुरू असून, येत्या महिन्याभरात याबाबत सकारात्मक कार्यवाही होईल, असे त्यांनी सांगितले. तसेच डॉ. पंजाबराव देशमुख वसतीगृह निर्वाह भत्ता योजनेतील प्रलंबित प्रश्नांवरही लवकर मार्ग काढून विद्यार्थ्यांना दिलासा देण्यासाठी आवश्यक ती कार्यवाही करण्यात येईल, असे आश्वासन त्यांनी दिले.
हजारो विद्यार्थी व युवकांवर परिणाम
या योजनांतील त्रुटींमुळे राज्यातील हजारो विद्यार्थी व युवक आर्थिक अडचणीत सापडले असून त्यांच्या शिक्षण, रोजगार आणि व्यवसायावर प्रतिकूल परिणाम होत असल्याचे निवेदनात नमूद करण्यात आले. संबंधित विभागांना आवश्यक निर्देश देऊन सर्व प्रलंबित प्रश्न तातडीने मार्गी लावावेत, अशी मागणी अखिल भारतीय मराठा महासंघाच्या वतीने करण्यात आली.
हे मान्यवर होते उपस्थित
यावेळी अखिल भारतीय मराठा महासंघाचे सातारा जिल्हाध्यक्ष श्री. अनिल शंकरराव घराळ, जिल्हा सरचिटणीस श्री. विवेक कुराडे पाटील, जिल्हा मीडिया प्रमुख सौ. विद्या मोरे, कराड दक्षिण तालुकाध्यक्ष श्री. युवराज कुराडे पाटील, कराड शहराध्यक्ष श्री. संदीप काळे तसेच श्री. भास्करराव थोरात उपस्थित होते.
Comments
Post a Comment