सहकाराच्या द्रष्ट्या नेतृत्वाला कृतज्ञ अभिवादन; लोकनेते स्व. विलासकाका उंडाळकर यांची ८८ वी जयंती १५ जुलै रोजी कराड मध्ये दिवसभर अभिवादन कार्यक्रम; सहकार, शिक्षण व ग्रामीण विकासातील योगदानाला सलाम

● कराड, प्रतिनिधी : विद्या मोरे 

सहकार चळवळीतील द्रष्टे नेतृत्व, ग्रामीण विकासाचे शिल्पकार आणि महाराष्ट्राचे माजी सहकार मंत्री लोकनेते स्व. विलासकाका पाटील (उंडाळकर) यांची ८८ वी जयंती मंगळवार, दि. १५ जुलै रोजी कराड येथे विविध कार्यक्रमांनी श्रद्धापूर्वक साजरी करण्यात येणार आहे. त्यांच्या कार्याला कृतज्ञ अभिवादन करण्यासाठी कोयना सहकारी बँकेच्या वतीने विशेष कार्यक्रमाचे आयोजन करण्यात आले आहे.

● दिवसभर अभिवादन कार्यक्रमाचे आयोजन :

कोयना सहकारी बँकेचे मुख्य कार्यालय, लोकनेते विलासकाका पाटील प्रवेशद्वार, मार्केट यार्ड, कराड येथे सकाळी १०.३० ते सायंकाळी ४.३० या वेळेत अभिवादन कार्यक्रम होणार असून, विविध क्षेत्रांतील मान्यवर त्यांच्या प्रतिमेस पुष्पांजली अर्पण करणार आहेत.

● ३५ वर्षे आमदार म्हणून प्रभावी नेतृत्व :

स्व. विलासकाका पाटील (उंडाळकर) यांनी जिल्हा परिषद सदस्य म्हणून सार्वजनिक जीवनाची सुरुवात केली. त्यानंतर सलग ३५ वर्षे आमदार म्हणून जनतेचे नेतृत्व करत महाराष्ट्राच्या राजकारणात वेगळी ओळख निर्माण केली. मंत्रीपदाच्या कार्यकाळात त्यांनी विकासाभिमुख निर्णयांद्वारे राज्याच्या प्रगतीत मोलाचे योगदान दिले.

● सहकार, शेती आणि ग्रामीण विकासाला दिली नवी दिशा :

सहकार, शेती, शिक्षण, पायाभूत सुविधा आणि ग्रामीण विकास या क्षेत्रांत त्यांनी दूरदृष्टीने केलेले कार्य आजही प्रेरणादायी मानले जाते. सर्वसामान्यांच्या हिताला केंद्रस्थानी ठेवून राबविलेल्या योजनांमुळे ग्रामीण भागाच्या विकासाला नवी गती मिळाली.

● नागरिकांना उपस्थित राहण्याचे आवाहन :

लोकनेते स्व. विलासकाका पाटील (उंडाळकर) यांच्या कार्याला कृतज्ञ अभिवादन करण्यासाठी आयोजित या कार्यक्रमास सहकार क्षेत्रातील पदाधिकारी, कार्यकर्ते, विविध संस्थांचे प्रतिनिधी, सामाजिक, शैक्षणिक व राजकीय क्षेत्रातील मान्यवर तसेच नागरिकांनी मोठ्या संख्येने उपस्थित राहावे, असे आवाहन रयत संघटनेच्या वतीने करण्यात आले आहे.