विद्यार्थ्यांच्या न्याय्य मागण्यांसाठी कराडात काँग्रेसचे आंदोलन; धर्मेंद्र प्रधान यांच्या राजीनाम्याचे स्वागत नामदेव पाटील (आप्पा) यांच्या नेतृत्वाखाली कॅन्डल मार्च व सत्याग्रह; NEET/CBSE विद्यार्थ्यांच्या न्याय्य मागण्यांना काँग्रेसचा ठाम पाठिंबा

 

कराड : विद्या मोरे;  NEET/CBSE संदर्भातील विद्यार्थ्यांच्या न्याय्य मागण्यांना पाठिंबा देण्यासाठी सातारा जिल्हा काँग्रेस कमिटीच्या वतीने कराड येथे कॅन्डल मार्च व सत्याग्रह आंदोलन करण्यात आले. अखिल भारतीय काँग्रेस कमिटीचे अध्यक्ष खासदार मल्लिकार्जुन खर्गे यांच्या आदेशानुसार, महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ, माजी मुख्यमंत्री पृथ्वीराज (बाबा) चव्हाण यांच्या मार्गदर्शनाखाली आणि सातारा जिल्हा काँग्रेस कमिटीचे जिल्हाध्यक्ष नामदेव पाटील (आप्पा) यांच्या नेतृत्वाखाली हे आंदोलन पार पडले.

विद्यार्थ्यांच्या न्यायासाठी काँग्रेस रस्त्यावर

भारतरत्न डॉ. बाबासाहेब आंबेडकर स्मारक येथे झालेल्या आंदोलनात काँग्रेसचे पदाधिकारी, कार्यकर्ते, विद्यार्थी आणि नागरिक मोठ्या संख्येने सहभागी झाले. हातात मेणबत्त्या घेऊन विद्यार्थ्यांच्या न्यायासाठी घोषणा देण्यात आल्या. विद्यार्थ्यांवरील कथित अमानुष कारवाईचा निषेध नोंदवत शिक्षण व्यवस्थेत पारदर्शकता, उत्तरदायित्व आणि विद्यार्थ्यांच्या भविष्याची हमी देण्याची मागणी करण्यात आली.

जंतर-मंतरवरील आंदोलनाला कराडमधून ऐक्याचा संदेश

गेल्या ३६ दिवसांपासून नवी दिल्लीतील जंतर-मंतर येथे विद्यार्थी आपल्या न्याय्य मागण्यांसाठी शांततापूर्ण आंदोलन करत होते. या आंदोलनाला कराडमधून पाठिंबा देत काँग्रेसने विद्यार्थ्यांच्या संघर्षाशी ऐक्य व्यक्त केले. विद्यार्थ्यांच्या न्याय्य हक्कांसाठी सुरू असलेल्या लढ्याला काँग्रेस पक्ष शेवटपर्यंत साथ देईल, असा निर्धार यावेळी व्यक्त करण्यात आला.

धर्मेंद्र प्रधान यांच्या राजीनाम्याचे स्वागत

आंदोलनादरम्यान केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिल्याच्या पार्श्वभूमीवर उपस्थितांनी या निर्णयाचे स्वागत केले. हा निर्णय विद्यार्थी एकजुटीचा, लोकशाहीवरील विश्वासाचा आणि सातत्यपूर्ण संघर्षाचा विजय असल्याची भावना यावेळी व्यक्त करण्यात आली.

'विद्यार्थ्यांच्या भविष्याशी तडजोड होणार नाही' – नामदेव पाटील (आप्पा)

यावेळी बोलताना सातारा जिल्हा काँग्रेस कमिटीचे जिल्हाध्यक्ष नामदेव पाटील (आप्पा) म्हणाले, "विद्यार्थ्यांच्या भविष्याशी संबंधित प्रश्नांवर कोणतीही तडजोड होऊ शकत नाही. गेल्या ३६ दिवसांपासून विद्यार्थी शांततापूर्ण आणि लोकशाही मार्गाने न्यायाची मागणी करत होते. त्यांच्या संघर्षाला काँग्रेस पक्षाने सुरुवातीपासून ठाम पाठिंबा दिला आहे. केंद्रीय शिक्षणमंत्री धर्मेंद्र प्रधान यांचा राजीनामा हा विद्यार्थी शक्तीचा, लोकशाहीचा आणि न्यायाच्या लढ्याचा विजय आहे. विद्यार्थ्यांच्या न्याय्य मागण्या पूर्ण होईपर्यंत काँग्रेस पक्ष त्यांच्या पाठीशी खंबीरपणे उभा राहील. शिक्षण व्यवस्थेत पारदर्शकता, उत्तरदायित्व आणि विद्यार्थ्यांचा विश्वास अबाधित राहील, यासाठी केंद्र सरकारने तातडीने ठोस निर्णय घ्यावेत."

विद्यार्थ्यांच्या मागण्या तातडीने मान्य करण्याची मागणी

या आंदोलनाच्या माध्यमातून विद्यार्थ्यांच्या न्याय्य मागण्या तातडीने मान्य कराव्यात, शिक्षण व्यवस्थेतील त्रुटी दूर करून पारदर्शक, विश्वासार्ह आणि विद्यार्थीहिताची व्यवस्था निर्माण करावी, तसेच विद्यार्थ्यांच्या भविष्याशी संबंधित प्रश्नांवर संवेदनशील भूमिका घ्यावी, अशी मागणी सातारा जिल्हा काँग्रेस कमिटीच्या वतीने करण्यात आली.