सहकारमहर्षी स्व. जयवंतराव भोसले (आप्पासाहेब) यांच्या पुण्यतिथी निमित्त पुतळ्यास अभिवादन

 

कराड : विद्या मोरे ;  सहकार क्षेत्रातील दूरदृष्टीचे नेतृत्व, कृष्णा उद्योग समूहाचे शिल्पकार आणि ग्रामीण विकासाला नवी दिशा देणारे सहकारमहर्षी स्व. जयवंतराव भोसले (आप्पासाहेब) यांच्या पुण्यतिथीनिमित्त त्यांच्या स्मृतींना अभिवादन करण्यात आले. यावेळी त्यांच्या पुतळ्यास पुष्पहार अर्पण करून उपस्थितांनी विनम्र अभिवादन केले.

स्व. जयवंतराव भोसले यांनी सहकाराच्या माध्यमातून ग्रामीण भागातील सर्वसामान्य शेतकरी, कामगार आणि नागरिकांच्या जीवनात सकारात्मक बदल घडवून आणण्यासाठी महत्त्वपूर्ण योगदान दिले. सहकार, उद्योग, शेती, आरोग्य, शिक्षण आणि समाजकारण या विविध क्षेत्रांत त्यांनी केलेले कार्य आजही दिशादर्शक ठरत आहे. त्यांच्या नेतृत्वातून उभ्या राहिलेल्या विविध संस्थांनी ग्रामीण भागाच्या आर्थिक व सामाजिक विकासाला मोठी चालना दिली.

कृष्णा सहकारी साखर कारखान्यासह विविध उपक्रमांच्या माध्यमातून त्यांनी शेतकऱ्यांच्या हिताला प्राधान्य दिले. ग्रामीण भागातील युवकांना रोजगाराच्या संधी उपलब्ध करून देणे, शिक्षण व आरोग्याच्या सुविधा सक्षम करणे तसेच सहकार चळवळ अधिक बळकट करण्यासाठी त्यांनी आयुष्यभर प्रयत्न केले. त्यांच्या कार्यातून अनेक सामाजिक व विकासात्मक उपक्रमांना प्रेरणा मिळाली.

पुण्यतिथीनिमित्त आयोजित अभिवादन कार्यक्रमात राष्ट्रीय खनिज विकास महामंडळ (भारत सरकार)चे स्वतंत्र संचालक मा. भरत पाटील (नाना), कराडचे माजी नगरसेवक हनुमंतराव पवार, बापूसाहेब सावंत, आप्पा सावंत यांच्यासह विविध क्षेत्रातील मान्यवर, कार्यकर्ते, पदाधिकारी व नागरिक उपस्थित होते.

यावेळी उपस्थितांनी स्व. जयवंतराव भोसले यांच्या कार्याचा गौरवपूर्ण उल्लेख करून त्यांच्या विचारांना व कार्याला उजाळा दिला. सहकार क्षेत्रात त्यांनी निर्माण केलेली मूल्यव्यवस्था, शेतकरीहिताची भूमिका आणि ग्रामीण विकासाची दूरदृष्टी आजच्या पिढीसाठीही प्रेरणादायी असल्याचे उपस्थितांनी नमूद केले.

स्व. जयवंतराव भोसले (आप्पासाहेब) यांनी उभारलेला सहकार व विकासाचा वटवृक्ष पुढील पिढ्यांसाठी प्रेरणास्थान राहील, अशा भावना यावेळी व्यक्त करण्यात आल्या. उपस्थितांनी त्यांच्या पुण्यस्मृतींना कृतज्ञतापूर्वक अभिवादन केले.