विकसित भारत २०४७’चा संकल्प; सेवेच्या वाटेवर कराड भाजपची ‘सेवा ज्योती’ यात्रा पंतप्रधान नरेंद्र मोदी यांच्या २५ वर्षांच्या लोकसेवेला कृतज्ञतापूर्वक अभिवादन; कार्यकर्त्यांचा उत्स्फूर्त सहभाग

कराड, ता. ८ : विद्या मोरे

मलकापूरपासून यात्रेला उत्स्फूर्त सुरुवात

पंतप्रधान नरेंद्र मोदी यांनी मुख्यमंत्री आणि पंतप्रधान म्हणून देशसेवेला दिलेल्या २५ वर्षांच्या योगदानाबद्दल कृतज्ञता व्यक्त करण्यासाठी भारतीय जनता पार्टी कराड दक्षिणच्यावतीने ‘सेवा ज्योती यात्रा’ काढण्यात आली. भाजपाचे जिल्हाध्यक्ष आमदार डॉ. अतुलबाबा भोसले यांच्या नेतृत्वाखाली झालेल्या या यात्रेत पक्षाचे पदाधिकारी व कार्यकर्ते मोठ्या संख्येने सहभागी झाले.

मलकापूर येथील भाजपा कार्यालयापासून ‘भारत माता की जय’ आणि ‘वंदे मातरम्’च्या जयघोषात यात्रेला सुरुवात झाली. देशभक्तीपर घोषणांनी परिसर दुमदुमून गेला. कार्यकर्त्यांचा उत्साह आणि नागरिकांचा सहभाग यामुळे यात्रेला विशेष वातावरण निर्माण झाले.

कोयना वसाहतीत मोदींचे संबोधन थेट प्रक्षेपित

यात्रा कोयना वसाहत येथील राजाभाऊ कोटणीस हॉल येथे पोहोचली. याठिकाणी पंतप्रधान नरेंद्र मोदी यांच्या संबोधनाचे मोठ्या स्क्रीनवर थेट प्रक्षेपण करण्यात आले. उपस्थित पदाधिकारी व कार्यकर्त्यांनी मोदींचे विचार ऐकत सेवा आणि राष्ट्रनिर्माणाचा संकल्प अधिक दृढ केला.

‘सेवा हीच राष्ट्रनिर्मितीची खरी शक्ती’

सेवा हीच राष्ट्रनिर्मितीची खरी शक्ती असून, जनसेवेतून देशाला अधिक सामर्थ्यवान बनविण्याचे आवाहन पंतप्रधान नरेंद्र मोदी यांनी आपल्या संबोधनातून केले. ‘विकसित भारत २०४७’चे स्वप्न साकार करण्यासाठी सरकारच्या प्रयत्नांसोबत प्रत्येक नागरिकानेही जबाबदारीने योगदान द्यावे, असे त्यांनी सांगितले.

सातारा जिल्हा विकसित भारतासाठी योगदान देईल

यावेळी माध्यमांशी संवाद साधताना आमदार डॉ. अतुलबाबा भोसले म्हणाले, “सेवा संकल्प अभियानांतर्गत गेल्या महिनाभरात समाजातील विविध प्रश्न सोडविण्याच्या दृष्टीने महाराष्ट्र प्रदेश भाजपने दिलेले विविध कार्यक्रम यशस्वीपणे राबविले आहेत. जनसेवेच्या माध्यमातून समाजातील विविध घटकांपर्यंत पोहोचण्याचा प्रयत्न करण्यात आला. विकसित भारताच्या निर्मितीमध्ये सातारा जिल्हा सर्वपरीने योगदान देईल, याची मला खात्री आहे.”

‘विकसित भारत’ची सामूहिक शपथ

यावेळी उपस्थितांनी विकसित भारत घडविण्याची शपथ घेतली. देशाच्या प्रगतीमध्ये प्रत्येक नागरिकाने आपली भूमिका पार पाडण्याचा संकल्प केला. तसेच क्रीडा क्षेत्रात उल्लेखनीय कामगिरी करणाऱ्या विविध खेळाडूंचा मान्यवरांच्या हस्ते सत्कार करण्यात आला.

पदाधिकारी, कार्यकर्त्यांची मोठी उपस्थिती

कार्यक्रमाला माजी आमदार आनंदराव पाटील, भाजपा किसान मोर्चाचे प्रदेशाध्यक्ष रामकृष्ण वेताळ, कराड पंचायत समिती सभापती नंदाताई यादव, सदस्य पैलवान धनंजय पाटील, ॲड. नरेंद्र नांगरे-पाटील, मलकापूरचे नगराध्यक्ष तेजस सोनावले, उपनगराध्यक्ष मनोहर शिंदे, जिल्हा परिषद सदस्या प्रियांका साळुंखे, शैलजा शिंदे, कराडचे नगरसेवक शिवाजी पवार, भाजपाचे जिल्हा उपाध्यक्ष पिनू जाधव, मंडल अध्यक्ष राजेंद्र यादव, प्रवीण साळुंखे, एकनाथ बागडी यांच्यासह पक्षाचे पदाधिकारी, कार्यकर्ते व नागरिक मोठ्या संख्येने उपस्थित होते.